Við ætlum að vinna með stjórnvöldum að umbótum
„Samtök iðnaðarins eru hreyfiafl í íslensku samfélagi, við eigum að taka frumkvæði í mikilvægum málum sem varða iðnaðinn. Við ætlum ekki að stunda hefðbundna hagsmunagæslu, heldur vinna að lausnum, koma inn í umræðuna á uppbyggilegan hátt og vinna með stjórnvöldum að umbótum í samfélaginu, sem auðvitað gagnast okkur öllum,“ segir Sigurður Hannesson, framkvæmdastjóri SI, meðal annars í viðtali sem Höskuldur Marselíusarson skrifar í Viðskiptablaðinu í dag. Samtök iðnaðarins munu leggja áherslu á fjóra meginþætti. „Mest áhersla verður lögð á menntamál, nýsköpun, styrkingu innviða og loks starfsumhverfi íslenskra iðnfyrirtækja, þættir eins og regluverk, skatta og hagstjórn.“ Sigurður segir að íslenskur iðnaður sé ein af lykilforsendum velmegunar í landinu. Útflutningsverðmæti iðnaðarins nemi á fimmta hundrað milljarða króna, tvær af fjórum meginstoðum útflutnings eigi rætur sínar í iðnaði og iðnaðurinn skapi fimmta hvert starf í landinu eða tæplega 40 þúsund störf.
Sigurður segir í viðtalinu að fyrir félagsmenn samtakanna sé stöðugt umhverfi lykilforsenda áætlunargerðar og vaxtar inn í framtíðina „Það er stærsta áskorun stjórnmálanna nú um stundir, að finna leiðir til þess að auka hér stöðugleikann.“ Hann segir tvennt skipta mestu máli í því samhengi. „Annars vegar er það peningastefnan, en hana er verið að endurskoða sem stendur, og við bíðum spennt eftir því hvað kemur út úr þeirri vinnu. Í mínum huga er kristaltært að rót vandans er mikill raunvaxtamunur við útlönd, sem horfa verður á til viðbótar við verð bólgumarkmið Seðlabankans. Sem þýðir auðvitað að vextirnir verða að lækka, enda leiða háir vextir, eða raunvaxtamunurinn, til innflæðis fjármagns sem á endanum bjagar stöðuna, og leitar svo hratt út þegar ójafnvægi myndast. Ríkisfjármálin eru svo hitt en Seðlabankinn hefur sjálfur sagt að með góðum samhljómi milli ríkisins og bankans, væru hér forsendur til þess að lækka vexti. Með öðrum orðum ef ríkissjóður sýnir aðhald á hagvaxtarskeiði, og bætir í þegar hagkerfið er að dragast saman, þá gætu vextir verið lægri en ella.“ Þá nefnir Sigurður að með hliðsjón af þeim hagvexti sem spáð er hér á landi á næstu árum hefðu Samtök iðnaðarins viljað sjá meira aðhald í ríkisfjármálaáætlun stjórnvalda. „Á árunum 2005 til 2007 var um 5 til 7% afgangur af rekstri ríkissjóðs. Skuldir ríkissjóðs voru minni og vaxtagreiðslurnar þar af leiðandi minni baggi,“ segir Sigurður en nú sé gert ráð fyrir um 1,5% afgangi af ríkissjóði. Þegar blaðamaður spyr hann hvort afgangur þessara ára fyrir hrunið hafi verið nægilegur ef horft er í baksýnispegilinn svarar hann: „Nei, sennilega ekki.“
Viðtalið er hægt að lesa í heild sinni í Viðskiptablaðinu.
Viðskiptablaðið, 31. ágúst 2017.