Vill að við smíðum Ísland 2.0 saman
Það má líta á þetta ástand fyrir það sem það vissulega er, harmleikur, en í þessari stöðu er líka gríðarlega mikið sóknartækifæri og stjórnvöld virðast vera tilbúin að bjóða upp í dans. Nýlega tilkynntu stjórnvöld þrælöflugan aðgerðapakka sem snýr að því að efla nýsköpun og rannsóknir og þróun á Íslandi. Þetta segir Tryggvi Hjaltason, formaður Hugverkaráðs Samtaka iðnaðarins, í grein sem birt er á Kjarnanum . Hann segir að það séu risa sóknartækifæri að myndast á Íslandi, hvort sem það snúi að því hvernig við endurbyggjum ferðaþjónustuna, nútímavæðum starfsemi hins opinbera betur, eflum heilbrigðistækni og þjónustu, finnum lausnir í umhverfistækni eða sækjum fram í hraðast vaxandi afþreyingariðnaði í heimi, tölvuleikjaiðnaði, sem sé nú í miklum vexti. Tækifærin séu mörg og mikið af skapandi Íslendingum velti því nú fyrir sér hvað þeir skuli gera næst og hvernig við getum snúið vörn í sókn. „Byggjum á ofurkraftinum okkar, virkjum íslenska hugvitið, nýtum okkur batnandi stuðningsumhverfi stjórnvalda og smíðum Ísland 2.0 saman.“
Nýsköpunaraðgerðir stjórnvalda
Í grein sinni bendir Tryggvi þeim á sem vilja hefja nýsköpun eða gefa í ef þeir eru þegar farnir af stað að ef aðgerðir stjórnvalda verði samþykktar á Alþingi þá verði hægt að sækja um styrk hjá Tækniþróunarsjóð og að líkurnar á því að fá styrk aukist töluvert vegna þess að stjórnvöld hafi nú bætt 700 milljónum króna í sjóðinn og ákveðið að flýta úthlutunarferlinu. Fyrir þá sem komast af stað eða eru nú þegar komnir af stað með nýsköpunarverkefni þá muni stjórnvöld endurgreiða 25% af öllum kostnaði sem til fellur vegna rannsóknar og þróunar. Einnig nefnir Tryggvi í greininni að stjórnvöld séu að koma upp hvatasjóðskerfi sem kallist Kría sem sé smíðað til að hjálpa til að finna fjármagn og tengja við alvöru fjárfesta. Auk þess að einstaklingar sem fjárfesta í nýsköpunarfyrirtækinu geti fengið skattaafslátt af fjárfestingu sinni og að hægt sé að greiða hluta af launum starfsmanna með kaupréttum og minnka þannig fjármögnunarþrýsting.
Á vef Kjarnans er hægt að lesa grein Tryggva í heild sinni.