275 nemendur útskrifast úr Tækniskólanum
Nemendur Tækniskólans mættu til útskriftar í Eldborgarsal Hörpu í vikunni en alls brautskráði skólinn 275 nemendur. Brautskráð var frá neðangreindum skólum/deildum Tækniskólans:
- Byggingatækniskólinn(31)
- Handverksskólinn(15 )
- Raftækniskólinn(58)
- Skipstjórnarskólinn(6)
- Upplýsingatækniskólinn(33)
- Véltækniskólinn(20)
- Tæknimenntaskólinn(29),
- Flugskólinn (26 )
- Meistaraskólinn ( 42)
- Hljóðtækninám (15)
Jón B. Stefánsson, skólameistari, flutti hátíðarræðu við athöfnina og vék meðal annars að nemendum framtíðarinnar og hvernig skólakerfið þarf að vera tilbúið til að taka á móti þeim. Hann minntist á stafræna frumbyggjann sem eru börnin og unglingarnir sem hafa haft snjalltæknina í höndunum samhliða því að læra móðurmálið. Skólakerfið þarf að vera tilbúið að taka á móti þessum nemum og Tækniskólinn stefnir á að leggja sitt af mörkum til þess. Þróa þarf starfs- og verknám svo litið verði til þess og skólans sem framsækins möguleika til framtíðar fyrir tæknivædda nemendur.
Haraldur Örn Arnarson er dúx Tækniskólans á haustönn 2016 með einkunnina 9,73 úr grafískri miðlun frá Upplýsingatækniskólanum og semidúx skólans, Andrea Jónsdóttir, útskrifaðist úr sama fagi með einkunnina 9,36. Þau eru á myndinni ásamt Þóri Pálssyni, aðstoðarskólameistara, Guðrúnu Randalín, skólastjóra Upplýsingatækniskólans, og Jóni B. Stefánssyni, skólameistara.