6. ágú. 2025 Almennar fréttir Starfsumhverfi

Alvarlegt mál að ESB skerði aðgang að innri markaði

„Það er alvarlegt mál að verndarráðstafanir ESB skuli ekki ná til okkar. Þannig að framleiðsla íslenskra fyrirtækja sé ekki vernduð. Þær bitna því meðal annars á okkur á meðan fyrirtæki innan ESB njóta góðs af verndaraðgerðunum,“ segir Sigurður Hannesson, framkvæmdastjóri SI, meðal annars í Viðskiptablaðinu um fyrir­hugaða tolla­setningu Evrópu­sam­bandsins gagn­vart ríkjum innan EES á járn­blendi, þar á meðal kísiljárn frá Ís­landi og Noregi, sem muni hafa mjög neikvæð áhrif á iðnaðinn hér­lendis.

Í fréttinni segir að grunnhugsunin með aðgerðunum sé að vernda evrópskan iðnað fyrir kísiljárni frá löndum með töluvert lægri framleiðslukostnað líkt og Kína, Indland eða Kasakstan. „Það hafa verið undirboð frá þessum aðilum á markaðinum en af þeim sökum er ESB að grípa til aðgerða. En undanskilur Ísland og Noreg frá þeim aðgerðum, sem bitnar á okkur. Við hefðum viljað njóta verndar, rétt eins og önnur fyrirtæki í þessari starfsemi innan ESB.“ Hann segir að Ísland hafi óskað eftir undanþágu eða hagfelldari útfærslum og sé það til skoðunar. „Evrópusambandið ber fyrir sig jafnræði, með réttu eða röngu, meðal annars vegna mikillar framleiðslu í Noregi. En íslensk stjórnvöld hafa talað ötullega fyrir hagsmunum Íslands sem skilar vonandi árangri.“

Þá kemur fram í frétt Viðskiptablaðsins að sögn Sigurðar þurfi að hafa í huga hvort þetta sé fyrirboði um hvað koma skuli frá Evrópusambandinu en sem fyrr segir hafi það aldrei gerst að Ísland njóti ekki verndarráðstafana. „Þá geta alls konar vörur orðið undir í framtíðinni og skaðað okkar hags­muni. Þetta er auðvitað sér­stakt af ýmsum sökum. Í fyrsta lagi vegna þess að við erum í EES og höfum því inn­leitt hluta af evrópska reglu­verkinu. Fyrir­tæki hér á landi í ýmissi starf­semi hafa tekið á sig skyldur og kröfur sem reglu­verkið knýr á, með til­heyrandi kostnaði, til þess að njóta ávinningsins af því að eiga greiðan að­gang að innri markaði ESB. Það er því mjög skrýtið að við séum að taka upp regluverkið ef aðgangur að innri markaðnum er skertur.“

Í niðurlagi fréttarinnar segir Sigurður að ekki sé öll nótt úti enn að við fáum undanþágu þó að það sé langt í frá sjálfgefið. „Þetta á að taka gildi eftir þrjár vikur og vara í 200 daga. Ef þetta fer þannig þá þurfum við að vona það að hagsmunagæslan á þessu tímabili beri þann árangur að við verðum undanþegin eftir það.“

Viðskiptablaðið, 28. júlí 2025.