Ár grænnar iðnbyltingar hvatning til aðgerða í loftslagsmálum
Sigurður Hannesson, framkvæmdastjóri SI, stýrði dagskrá þegar Ári grænnar iðnbyltingar var ýtt úr vör í starfsstöð Carbfix á Hellisheiði. Hann greindi meðal annars frá tilgangi þess að Samtök iðnaðarins tileinka árið 2022 grænni iðnbyltingu en með ári grænnar iðnbyltingar vilja samtökin hvetja til aðgerða á sviði loftslagsmála.
Í tilefni ársins var útbúið nýtt myndmerki sem frumsýnt var á viðburðinum. Sigurður sagði um myndmerkið að þar væri notast við laufblaðið sem sé alþjóðleg táknmynd grænna umbreytinga. Mismunandi stærð blaðanna vísi til fjölbreytni í iðnaði og hvernig fyrirtæki af öllum stærðum taki þátt í þessu mikilvæga verkefni. Grænu punktarnir sem mynda Ísland tákni almenna vitundarvakningu sem nú eigi sér stað og sé nauðsynleg til að við getum öll lagst á eitt; atvinnulífið, stjórnvöld og almenningur, til að brýn úrlausnarefni í loftslagsmálum nái fram að ganga og Ísland skipi sér í fremstu röð á þessu sviði.
