Askur er nýr mannvirkjarannsóknarsjóður
Húsnæðis- og mannvirkjastofnun, HMS, hefur auglýst í fyrsta sinn eftir umsóknum um styrki úr mannvirkjarannsóknarsjóðnum Aski. Styrkirnir eru veittir til rannsókna- og þróunarverkefna á sviði mannvirkjamála. Heildarfjárhæð til úthlutunar vegna umsókna á árinu 2021 er 95 milljónir króna. Hver einstakur styrkur sem sótt er um skal ekki nema hærri fjárhæð en 19 milljónir króna og ekki meira en 70% kostnaðaráætlunar viðkomandi verkefnis. Bæði lögráða einstaklingar og lögaðilar geta sótt um.
Umsóknarfrestur er til og með 9. desember næstkomandi. Á vef HMS er hægt að nálgast rafræna styrktarumsókn og nánari upplýsingar um úthlutunina og starfsemi sjóðsins.
Við úthlutun sjóðsins fyrir árið 2021 er lögð áhersla á:
- Raka- og mygluskemmdir
- Byggingarefni
- Orkunýtingu og losun gróðurhúsalofttegunda
- Tækninýjungar
- Gæði og ólík form íbúðarhúsnæðis
Opinn rafrænn kynningarfundur
HMS stendur fyrir opnum rafrænum kynningarfundi fyrir þau sem hafa áhuga á sækja um í sjóðinn. Fundurinn er haldinn 18. nóvember kl. 12-12.50 á Teams. Hér er hægt að nálgast Teams-hlekkinn.
Á vef HMS er hægt að nálgast frekari upplýsingar um Ask og fundinn.
