Bjartsýni breytist í svartsýni meðal stjórnenda í iðnaði
Í nýrri greiningu SI kemur fram að mun fleiri stjórnendur iðnfyrirtækja telja nú að aðstæður í efnahagslífinu séu slæmar fyrir þeirra fyrirtæki en þeir sem telja þær góðar. Þetta er alger viðsnúningur frá því fyrir ári þegar þessu var öfugt farið. 36% svarenda í könnun meðal stjórnenda iðnfyrirtækja innan Samtaka iðnaðarins telja aðstæður í efnahagslífinu á Íslandi slæmar fyrir þeirra fyrirtæki. Þetta er aukning frá því fyrir ári þegar 17% töldu aðstæður í efnahagslífinu slæmar. Einnig dregur verulega úr fjölda þeirra sem telja aðstæður góðar. Ríflega fjórðungur svarenda, eða 26%, telur að aðstæður í efnahagslífinu séu góðar nú en fyrir ári var það ríflega helmingur, eða 54%, sem mat aðstæður góðar. Þetta er meðal þess sem kemur fram í niðurstöðum könnunar sem Outcome framkvæmdi meðal stjórnenda iðnfyrirtækja innan Samtaka iðnaðarins í febrúar og mars á þessu ári.
Fleiri telja að starfsfólki muni fækka en fjölga
Stjórnendur voru spurðir að því hvernig horfir með fjölda starfsmanna í þeirra fyrirtæki á næstu 12 mánuðum. Í fyrsta sinn síðan 2020 segir hærra hlutfall stjórnenda að starfsmönnum muni fækka en fjölga. Hlutfall þeirra sem segja að þeim muni fækka er 23% en 20% segja að þeim muni fjölga. Er þetta talsverð breyting frá því í fyrra þegar 13% sögðu að starfsmönnum myndi fækka en 28% að þeim myndi fjölga. Niðurstaðan bendir til þess að á næstu tólf mánuðum munu iðnfyrirtæki fækka starfsfólki til að mæta samdrætti. Sú þróun er raunar þegar hafin; störfum í greininni hefur fækkað, atvinnuleysi aukist og lausum störfum fækkað.
Þrátt fyrir að starfsfólki fækki er enn talsverður skortur á mannauði með rétta færni og menntun í greinum iðnaðarins. Hins vegar hefur dregið úr skortinum undanfarið og má rekja það til þess samdráttar sem fyrirtæki í iðnaði hafa orðið fyrir.
Vænta samdráttar í fjárfestingum
Stjórnendur iðnfyrirtækjanna voru spurðir að því hvernig þeir telji að fjárfestingar fyrirtækja þeirra í afkastagetu (húsnæði, vélum og tækjum) komi til með að þróast á næstu 12 mánuðum. 23% segja að þær aukist en 24% að þær minnki. 49% segja að þær standi í stað. Talsverð breyting hefur orðið í þessum hlutföllum síðan fyrir ári en þá sögðu 29% að fjárfestingarnar myndu aukast, 9% að þær myndu minnka og 58% að þær myndu standa í stað. Benda svarhlutföllin nú til þess að stöðnun verði í þessum fjárfestingum greinarinnar á næstu 12 mánuðum.
Hér er hægt að nálgast greininguna í heild sinni.