Bleika slaufan 2018 verður afhjúpuð í Kringlunni í dag kl. 17 og á sama tíma verður opnuð ljósmyndasýning sem nefnist Bleik.
Hönnuður bleiku slaufunnar í ár er Páll Sveinsson, gullsmíðameistari hjá Jóni og Óskari, en hann sigraði í samkeppni Krabbameinsfélagsins og Félags íslenskra gullsmiða um hönnun Bleiku slaufunnar en Félag íslenskra gullsmiða er aðili að Samtökum iðnaðarins. Páll hefur mikla reynslu í skartgripahönnun og smíði skartgripa og hefur starfað við fagið í 23 ár. Þetta er í sjöunda sinn sem Bleika slaufan er sett á markað.
Ljósmyndasýningin Bleik byggir á persónulegum sögum tólf kvenna sem hafa greinst með brjósta- eða leghálskrabbamein. Ásta Kristjánsdóttir, ljósmyndari, Sóley Ástudóttir, förðunarfræðingur, Anna Clausen, stíllisti og Sigríður Sólan, blaðamaður, eiga veg og vanda að sýningunni sem stendur út októbermánuð.
