Engin rök fyrir hækkun fasteignaskatta
„Við teljum að engin rök séu fyrir hækkun fasteignaskatta út frá aukinni eða bættri þjónustu sveitarfélaga. Hún kemur aðeins til vegna þess að ófremdarástand er á húsnæðismarkaði, sem hefur leitt til þess að húsnæðisverð hefur hækkað mjög hratt undanfarið,“ segir Ingólfur Bender, aðalhagfræðingur SI, í fréttaskýringu Helga Bjarnasonar, blaðamanns, í Morgunblaðinu. Þar kemur fram að boðuð hækkun fasteignamats muni að óbreyttu hafa í för með sér þriggja milljarða króna hækkun á fasteignasköttum af atvinnuhúsnæði, fari úr 29-30 milljörðum í 32-33 milljarða. Samkvæmt útreikningum Þjóðskrár Íslands hækki fasteignamat á atvinnuhúsnæði um 10,2% um næstu áramót.
Hækkun fasteignamats heimatilbúin hjá sveitarfélögunum
Ingólfur segir í Morgunblaðinu að hækkun matsins sé að vissu leyti komin til vegna þess að ekki sé nægjanlegt framboð af húsnæði, að hluta vegna skorts á lóðum. Hækkun matsins sé því heimatilbúin í sveitarfélögum og leiði síðan til hækkunar skatta ef ekki verði brugðist við með því að lækka álagningarprósentu.
Dregur úr samkeppnishæfni og kemur niður á vexti
Í fréttaskýringunni kemur fram að Samtök iðnaðarins reikni hækkunina 112% síðustu tíu ár, fyrir utan hugsanlega hækkun á næsta ári. Ingólfur segir í Morgunblaðinu að skatturinn sé orðinn mjög hár í alþjóðlegum samanburði og nefnir sem dæmi að sveitarfélög hérlendis taki í heildina 0,9% af landsframleiðslu en hlutfallið sé 0,2% í Noregi og 0,4% í Finnlandi og Svíþjóð. „Þetta dregur úr samkeppnisfærni okkar fyrirtækja og kemur niður á vexti þeirra.“
Morgunblaðið, 2. júní 2022.