Flóknari mannvirkjagerð kallar á meiri sérþekkingu
Jóhanna Klara Stefánsdóttir, sviðsstjóri mannvirkjasviðs SI, segir í sérblaði Morgunblaðsins um Verk og vit að íslenski mannvirkjageirinn standi frammi fyrir mannauðsvanda. „Líkt og kemur fram í nýrri greiningu Samtaka iðnaðarins starfa um 20.000 manns við bygginga- og mannvirkjagerð hér á landi sem er um 9% af öllum vinnumarkaðinum. Störfin eru fjölbreytt og iðnaðurinn að breytast mjög hratt, og þróast æ meira í þá átt að verða hátæknidrifinn svo mannvirkjagerð verður æ flóknari og kallar á æ meiri sérþekkingu. Ef vel á að vera þurfum við að hlúa vel að mannauðinum, styðja vandlega við bakið á iðnmenntun og auka áherslur á STEM-greinar á háskólastigi.“
600-1.000 áhugasamir umsækjendur fá ekki skólavist
Í viðtalinu við Jóhönnu Klöru kemur jafnframt fram að allt að 1.000 komist ekki að hjá iðnskólunum. Hún segir að vöxtur íslenska bygginga- og mannvirkjageirans hafi verið ævintýralegur. „Á síðustu fimmtán árum hafa 11.000 manns bæst við greinina en við sjáum að þessari miklu fjölgun fylgja ákveðnir vaxtarverkir. Viðvarandi skortur er á fólki með tiltekna menntun og þjálfun og í skoðanakönnunum sem lagðar hafa verið fyrir stjórnendur blasir við að sérstök þörf er fyrir fleira iðnmenntað fólk. Vandamálið stafar ekki af því að unga fólkið hafi ekki áhuga á iðnnámi, og ár hvert fá um 600 til 1.000 umsækjendur ekki skólavist vegna þess að ekki er hægt að taka við fleiri nemendum. Þeir sem fá synjun fyrstir af öllum eru nemendur 21 árs og eldri, og mjög erfitt fyrir þá að komast að því þeir sem yngri eru fá forgang. Þetta er sorgleg staðreynd enda eru eldri nemendurnir oftar en ekki með reynslu í farteskinu sem hefur leitt þá að þeirri niðurstöðu að þeir vilji leggja iðngreinarnar fyrir sig. Þetta ástand er óviðunandi.“
Hér er hægt að lesa viðtalið við Jóhönnu Klöru í heild sinni.
Morgunblaðið, 19. mars 2026.
