Formaður SI heimsótti félagsmenn á Akureyri
Guðrún Hafsteinsdóttir, formaður SI, heimsótti nokkra af félagsmönnum SI á Akureyri sem starfa í mannvirkjageiranum. Í heimsókn sinni til Trétaks skoðaði Guðrún nýjar íbúðír í Hagahverfi á Akureyri sem fyrirtækið er með í smíðum. Í samtali hennar við forsvarsmenn fyrirtækisins kom fram að töluverður verðmunur er á nýjum íbúðum á Akureyri og á höfuðborgarsvæðinu en dæmi eru um 46 fm íbúðir sem eru til sölu á 20 milljónir króna og 65 fm íbúðir á ríflega 24 milljónir króna. Ástæðu verðmunarins segja forsvarsmenn Trétaks vera lægra lóðaverð á Akureyri en á höfuðborgarsvæðinu og það skili sér til kaupenda auk þess sem lögð sé áhersla á gott skipulag í allri framleiðslunni til að ná fram góðri framleiðni. Á myndinni hér fyrir ofan er Guðrún ásamt Jóhanni Þórðarsyni húsasmíðameistara og eiganda Trétaks.
Guðrún heimsótti einnig ÁK smíði. Fyrirtækið einbeitir sér meira að viðhaldsverkum frekar en nýframkvæmdum og er með meistara í vinnu í nánast öllum byggingariðngreinum og iðnsveinar eru starfandi í öllum iðngreinum sem fyrirtækið býður þjónustu í. ÁK smíði er með 10 nema á samningi og leggjur því áherslu á mikilvægi nýliðunar í byggingariðnaði. ÁK smíði var stofnað 2004 og starfa Hjá félaginu starfa yfir 30 manns við ýmsar greinar byggingariðnaðarins. Við sjáum um húsbyggingar, þakviðgerðir, parketslípun og margt fleira. Á myndinni eru auk Guðrúnar, Ármann Ketilsson og Finnur R. Jóhannesson sem eru meðal eigenda.
Þá heimsótti Guðrún SS Byggir sem var stofnað 1978. Hjá fyrirtækinu starfa um 50 manns auk fjölda undirverktaka. Á fyrstu árum starfseminnar voru byggð nokkur einbýlishús og raðhús en eftir 1990 og fram til dagsins í dag hefur fyrirtækið komið að stærri framkvæmdum eins og byggingu skóla, sjúkrahúsa, íþróttahúsa og skrifstofu- og verslunarhúsnæðis. Umsvif fyrirtækisins hafa stóraukist og hafa þessar stóru framkvæmdir kallað á fleira starfsfólk, aukinn tækjabúnað og bætta gæðastjórnun. Á myndinni eru með Guðrúnu, hjónin Sigurður Sigurðsson og Hólmfríður D. Kristjánsdóttir.