Gríðarleg efnahagsleg áhrif álversins í Straumsvík
Sigurður Hannesson, framkvæmdastjóri SI, segir í hádegisfréttum RÚV að samtökin hafi talað um það síðustu vikur að það séu óveðurský yfir Íslandi og fréttir af Straumsvík í morgun séu enn ein staðfesting þess. „Og þetta eru býsna skýr skilaboð sem þarna koma fram.“ Tilkynnt var í morgun að Rio Tinto endurskoðar rekstur álversins og að hugsanlega verði dregið úr framleiðslu fyrirtækisins eða því lokað.
„Við höfum haft áhyggjur af þessu í lengri tíma og bent á það að í orkumálum eins og í öðrum málum þurfi að líta til virðiskeðjunnar í heild sinni. Ekki bara til þess að einu fyrirtæki gangi vel heldur til þess að iðnaðurinn sé sjálfbær,“ segir Sigurður í fréttum RÚV. Hann vísar til þess að í tilkynningu frá Rio Tinto komi fram að verðið sem fyrirtækinu býðst sé ekki samkeppnishæft.
Sigurður bendir á að efnahagsleg áhrif álversins í Straumsvík séu gríðarleg. Fyrirtækið greiði 11 milljarða til samfélagsins í gegnum skatta og kaup á vörum og þjónustu fyrir utan raforkuverð. „Á bak við það eru mörg störf og mörg fyrirtækinu í nærsamfélaginu byggja og reiða sig á viðskipti við þetta fyrirtæki.“
Á vef RÚV er hægt að hlusta á viðtalið við Sigurð, 12. febrúar 2020.
Staðfestir að efnahagsleg óverðursský eru yfir Íslandi
Þá var rætt við Sigurð í Fréttablaðinu þar sem hann segir tíðindin af rekstrarerfiðleikum álversins í Straumsvíks staðfesta að efnahagsleg óveðursský séu yfir Íslandi. Staðan sé grafalvarleg, en hann vonast til þess að endurskoðun á rekstrargrundvelli muni fela í sér jákvæðar niðurstöður.
Í fréttinni kemur fram að líkt og fram hafi komið hafi forsvarsmenn Rio Tinto greint frá því að allar leiðir verði kannaðar til að bregðast við þrengingum í rekstri álversins, þar á meðal komi til greina að loka álverinu alfarið en um 500 manns vinna í álverinu og því ljóst að mörg störf eru í húfi.
„Þetta er náttúrulega grafalvarleg staða. Við höfum talað um það núna upp á síðkastið að það séu óveðursský yfir Íslandi og ég held að þetta staðfesti það,“ segir Sigurður í samtalinu við Fréttablaðið. „Þarna er auðvitað mikið í húfi, margir starfsmenn og umsvifin teygja sig auðvitað svolítið langt út. Álverið er að kaupa þjónustu af mörgum fyrirtækjum í nærsamfélaginu.“
Í fréttinni segir Sigurður að Samtök iðnaðarins hafi haft áhyggjur af stöðunni í lengri tíma. „Staðan á alþjóðamörkuðum er vissulega krefjandi en það er áhugavert að sjá það í tilkynningu fyrirtækisins í morgun, að þar er sérstaklega vísað til þess að raforkuverð sé ekki samkeppnishæft. Það eru auðvitað býsna skýr skilaboð. Að þrátt fyrir þessar krefjandi aðstæður sem auðvitað öll álver í heiminum glíma við, að þá virðist þetta vera staðan hér. Að raforkuverðið sem þessu fyrirtæki býðst virðist ekki vera samkeppnishæft.“ Hann segir að samtökin voni að við endurskoðun á rekstrinum sjái fyrirtækið grundvöll fyrir áframhaldandi starfsemi á Íslandi. „Eins og bent er á í tilkynningunni að þá stendur til að eiga samtöl við helstu hagaðila. Þar er vísað í stéttarfélög, Landsvirkjun, stjórnvöld og fleiri þannig að þá vonandi skila þau samtöl einhverjum árangri, þannig að fyrirtækið sjái frekari grundvöll fyrir starfsemi hér á landi.“
Frettabladid.is, 12. febrúar 2020.
Gríðarlega mikið í húfi
Einnig er rætt við Sigurð um stöðu álversins í Straumsvík á mbl.is þar sem hann segir að alvarlegar fréttir morgunsins þess efnis að álverinu í Straumsvík verði mögulega lokað séu enn ein staðfesting þess að óveðursský séu yfir Íslandi. „Það virðist ekki vera að létta til,“ segir Sigurður á mbl.is og bætir við að staðan sé býsna alvarleg þar sem til greina komi að Rio Tinto hætti rekstri hér á landi. „Vonir standa til þess að fyrirtækið sjái áframhaldandi grundvöll fyrir starfsemi hér á landi.“ Hann segir að gríðarlega mikið sé í húfi. „Útflutningstekjur á vegum fyrirtækisins eru í kringum 60 milljarðar á ári. Fjöldi starfa er í álverinu sjálfu en þá má ekki gleyma því að fyrirtækið kaupir vörur og þjónustu á Íslandi og borgar laun til starfsmanna fyrir hátt í ellefu milljarða króna.“ Þá segir Sigurður í fréttinni að mikill þungi hafi verið í því sem haft var eftir Alf Barrios, forstjóra Rio Tinto Aluminium, í tilkynningu í morgun en þar hafi meðal annars komið fram að álverið væri ekki samkeppnishæft í krefjandi markaðsaðstæðum vegna hás raforkukostnaðar. „Þarna er um að ræða fyrirtæki sem rekur álver og orkusækinn iðnað víða um heim og hefur þar af leiðandi góðan samanburð. Núna blasir við að það munu verða viðræður um breytingar á þeirri stöðu,“ segir Sigurður og bætir við að erfitt sé að segja til um hvort þær skili einhverju.
mbl.is, 12. febrúar 2020.