Heimsmarkmiðasjóður atvinnulífsins opinn fyrir umsóknir
Utanríkisráðuneytið hefur auglýst að Heimsmarkmiðasjóður atvinnulífsins um þróunarsamvinnu sé opinn fyrir umsóknir. Umsóknarfrestir eru 3. febrúar, 3. maí og 3. október á þessu ári. Hægt er að senda fyrirspurnir um sjóðinn á netfangið atvinnulifssjodur@utn.is. Umsóknir þurfa að berast í gegnum þennan hlekk: www.island.is/atvinnulifssjodur.
Með þátttöku leggja fyrirtæki af mörkum við að draga úr fátækt og stuðla að sjálfbærni með eflingu atvinnu- og viðskiptalífs í þróunarlöndunum. Um leið auka þau samkeppnishæfni sína á framtíðarmörkuðum. Sérstaklega er hvatt til þess að verkefni stuðli að jafnrétti kynjanna og að jákvæðum umhverfis- og loftslagsáhrifum.