Heimsókn í Laugardalshöllina
Guðrún Hafsteinsdóttir, formaður SI, og Sigurður Hannesson, framkvæmdastjóri SI, fóru í dag í heimsókn í Laugardalshöllina. Það voru Sveinn Hannesson, formaður ÍSH, og Birgir Bárðarson, framkvæmdastjóri, sem tóku á móti þeim. Í heimsókninni voru málefni hússins rædd en Samtök iðnaðarins eiga hlut í Íþrótta- og sýningarhöllinni, ÍSH, sem er rekstraraðili Laugardalshallarinnar.
Það má segja að Laugardalshöllin sé félagsheimili Reykvíkinga þar sem fram fara íþróttaviðburðir, tónleikar, sýningarhald og hverskonar menning. Þá má nefna að talning atkvæða í Reykjavík fer fram í höllinni. Meðal viðburða er útskrift Tækniskólans sem fram fer á morgun. Um er að ræða fjölnota hús sem er samtals um 20 þúsund fermetrar og rúmar allt að 11 þúsund manns. Í Laugardalshöllinni eru fimm íþróttasalir, fjöldi mismunandi ráðstefnu- og veislusala auk sýningasvæða.