Heimsókn kvenna frá systursamtökum SI
Konur frá VNO-NCW sem eru systursamtök Samtaka iðnaðarins í Hollandi heimsóttu Ísland fyrir skömmu. Þær voru 22 talsins og heimsóttu meðal annars Marel og Alþingi.
Guðrún Hafsteinsdóttir, formaður SI, hélt erindi fyrir konurnar þar sem hún sagði meðal annars frá þeim árangri sem náðst hefur í jafnréttismálum á Íslandi og framgangi íslenskra kvenna í atvinnulífinu. Hún sagði það hafa verið mikilvægt skref þegar lög um fæðingarorlof voru sett á þar sem karlar bæru jafnmikla ábyrgð og konur á bæði heimilinu og uppeldi barna.
Þá sagði hún það hafa skipt verulegu máli þegar ákveðið var að tiltekið hlutfall kvenna ætti að vera í stjórnum fyrirtækja og það hafi sýnt sig að það væri engin fyrirstaða hjá körlum að skipa konur í stjórnir. Það væri lykilatriði að konur og karlar þyrftu að vinna saman að því að árangur náist á sviði jafnréttis á öllum sviðum. Guðrún ræddi einnig #metoo byltinguna.