Heimsókn til Carbfix
Fulltrúar Samtaka iðnaðarins heimsóttu fyrirtækið Carbfix í dag. Til umræðu voru meðal annars loftslagsmál en fyrirtækið sérhæfir sig í að fanga CO2 úr útblæstri, leysa upp í vatni og dæla niður í berglög þar sem það steinrennur á umhverfisvænan hátt. Carbfix byrjaði upphaflega sem samstarfsverkefni milli Orkuveitu Reykjavíkur, Háskóla Íslands, CNRS í Touluse og Columbia Háskóla árið 2007 en varð í ársbyrjun 2020 að sjálfstæðu dótturfyrirtæki Orkuveitu Reykjavíkur.
Tilraunaniðurdæling fór fyrst fram við Hellisheiðarvirkjun þar sem rúmlega 90% af koldíoxíðinu sem dælt var niður í bergið umbreyttist í grjót á innan við tveimur árum, en áður var talið að þetta ferli gæti tekið hundruð eða jafnvel þúsundir ára. Carbfix aðferðin hefur nú verið starfrækt í meira en fimm ár sem hluti af hefðbundnum rekstri Hellisheiðarvirkjunar og minnkar CO2 útblástur hennar um þriðjung.
Á myndinni eru, talið frá vinstri, Sigurður Hannesson, framkvæmdastjóri SI, Edda Sif Pind Aradóttir, framkvæmdastýra Carfix, og Lárus M.K. Ólafsson, viðskiptastjóri á iðnaðar- og hugverkasviði SI.