Iðnþing í dag og útgáfa nýrrar skýrslu
Iðnþing Samtaka iðnaðarins fer fram í Silfurbergi í Hörpu í dag 8. mars kl. 13.30 - 17.00. „Ísland í fremstu röð – eflum samkeppnishæfnina“ er yfirskrift Iðnþings 2018. Samhliða Iðnþingi gefa Samtök iðnaðarins út ítarlega skýrslu með sama heiti sem fjallar um samkeppnishæfni Íslands og helstu áskoranir. Skýrslan er unnin af starfsmönnum Samtaka iðnaðarins og er í skýrslunni horft til samkeppnishæfni Íslands út frá menntun, nýsköpun, innviðum og starfsumhverfi. Í skýrslunni eru einnig samantektir um stöðu hagkerfisins, umhverfismál og þær tæknibreytingar sem eru framundan.
Meðal þess sem kemur fram í skýrslunni, sem er hátt í 100 síður, eru helstu áskoranir sem þarf að mæta til að efla samkeppnishæfni landsins að mati Samtaka iðnaðarins.
Hér er hægt að nálgast skýrsluna.
Fjórir ráðherrar taka þátt í umræðum
Á Iðnþingi koma saman ráðherrar og leiðtogar aðildarfyrirtækja samtakanna til að ræða um samkeppnishæfni Íslands en samkeppnishæfni ríkja breytist stöðugt og því er stefnumótun mikilvægasta verkefni stjórnvalda hverju sinni. Með skýrri sýn og eftirfylgni má vinna að raunverulegum umbótum í samfélaginu og efla samkeppnishæfni Íslands. Þannig er lagður grunnur að auknum lífsgæðum landsmanna. Í umræðunum á þinginu á meðal annars að leita svara við því hver eru mikilvægustu verkefnin til að ná árangri og hvernig bregðast þarf við helstu áskorunum.
Í upphafi þingsins flytja ávörp Guðrún Hafsteinsdóttir, formaður Samtaka iðnaðarins, og Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra. Þá eru umræður í fjórum pallborðum sem verður stjórnað af þeim Ingólfi Bender, aðalhagfræðingi SI, og Sigríði Mogensen, sviðsstjóra hugverkasviðs SI. Í lok þingsins flytur Sigurður Hannesson, framkvæmdastjóri SI, erindi. Sjá dagskrá hér fyrir neðan.
Dagskrá Iðnþings 2018
Kl. 13.30 ÁVARP
Guðrún Hafsteinsdóttir, formaður SI
Kl. 13.45 ÁVARP
Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra
Kl. 14.00 VIRKJUM TÆKIFÆRIN
Gestur Pétursson, forstjóri Elkem á Íslandi
Sesselja Vilhjálmsdóttir, stofnandi og forstjóri Tagplay
Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra
Kl. 14.15 FJÁRFESTING Í DAG ER HAGVÖXTUR Á MORGUN
Guðmundur Ingi Guðbrandsson, umhverfis- og auðlindaráðherra
Ólöf Helgadóttir, rafmagnsverkfræðingur hjá Lotu
Sigurður R. Ragnarsson, forstjóri ÍAV
Kl. 14.30 MENNTAKERFIÐ ER EKKI EYLAND
Finnur Oddsson, forstjóri Origo
Lilja Dögg Alfreðsdóttir, mennta- og menningarmálaráðherra
Rannveig Rist, forstjóri Rio Tinto á Íslandi
Kl. 14.45 LEITIN AÐ STÖÐUGLEIKA
Andri Þór Guðmundsson, forstjóri Ölgerðarinnar
Bjarni Benediktsson, fjármála- og efnahagsráðherra
Eva Hlín Dereksdóttir, framkvæmdastjóri Raftákns
Kl. 15.00 Áræðni, ný hugsun og djörf framtíðarsýn
Sigurður Hannesson, framkvæmdastjóri SI
Að þingi loknu verður boðið upp á léttar veitingar.
