Kallað eftir tilnefningum til Hönnunarverðlauna Íslands 2016
Hægt er að senda tilnefningar til Hönnunarverðlauna Íslands fram til miðnættis föstudagsins 9. september og er mögulegt að benda á eigin verk og verk annarra. Markmið með innsendingum er að tryggja að afburða verk fari ekki fram hjá dómnefndinni. Hægt er að tilnefna í tveimur flokkum; Hönnun ársins 2016 og Besta fjárfesting ársins 2016 í hönnun.
Til að hljóta Hönnunarverðlaun Íslands 2016 þurfa hönnuðir að vera félagar í einu af aðildarfélögum Hönnunarmiðstöðvar Íslands eða vera fagmenn á sínu sviði. Ný verk teljast til þeirra verka sem lokið hefur verið við á síðustu tveimur til þremur árum fyrir afhendingu verðlaunanna. Besta fjárfesting í hönnun 2016 er viðurkenning sem veitt verður fyrirtæki sem hefur með eftirtektarverðum hætti fjárfest í hönnun og arkitektúr eða innleitt aðferðir hönnunar í grunnstarfsemi sína. Fyrirtæki sem eiga þess kost að hljóta viðurkenninguna hafa hönnun og arkitekúr að leiðarljósi frá upphafi verka til að auka verðmætasköpun og samkeppnishæfi. Öll fyrirtæki sem starfa á Íslandi koma til greina.
Formaður dómnefndar er Harpa Þórsdóttir, forstöðumaður Hönnunarsafns Íslands og fyrrum deildarstjóri sýningardeildar Listasafns Íslands. Aðrir í dómnefnd eru Almar Guðmundsson, framkvæmdastjóri SI, Katrín Káradóttir, fatahönnuður og fagstjóri fatahönnunardeildar Listaháskóla Íslands, Massimo Santanicchia, arkitekt og lektor við Listaháskóla Íslands, Guðrún Lilja Guðlaugsdóttir, vöru- og iðnhönnuður, og Högni Valur Högnason, grafískur hönnuður.