Kröftugur vöxtur í tækni- og hugverkaiðnaði
Nýjar tölur Hagstofu Íslands um veltu samkvæmt virðisaukaskattsskýrslum sýna kröftugan vöxt í íslenskum tækni- og hugverkaiðnaði. Velta í tækni- og hugverkaiðnaði, án lyfjaframleiðslu, nam 225 milljörðum króna á fyrstu fjórum mánuðum ársins samanborið við 201 milljarð króna á sama tímabili í fyrra. Það jafngildir ríflega 12% vexti á milli ára.
Þróunin undirstrikar enn á ný mikilvægi tækni- og hugverkaiðnaðar fyrir íslenskt efnahagslíf. Greinin hefur vaxið hratt á undanförnum árum og fest sig í sessi sem ein af fjórum lykilstoðum útflutnings. Útflutningstekjur greinarinnar námu 369 milljörðum króna í fyrra og á fyrstu fjórum mánuðum þessa árs jukust þær, án lyfjaiðnaðar, um 24% samkvæmt gögnum Hagstofunnar. Innan greinarinnar eru meðal annars fyrirtæki í líf- og heilbrigðistækni, menntatækni, upplýsingatækni, tölvuleikjaiðnaði og hátækniframleiðslu. Vöxtur greinarinnar felur í sér aukna verðmætasköpun, fjölbreyttari útflutning, fleiri háframleiðnistörf og aukinn viðnámsþrótt hagkerfisins.
Vöxturinn í útflutningstekjum greinarinnar í ár skýrist að stórum hluta af auknum útflutningstekjum gagnavera. Var veltan í upplýsingaþjónustu, svo sem gagnavinnslu og hýsingu, 11,1 milljarðar króna á fyrstu fjórum mánuðum síðasta árs en 27 milljarðar króna á sama tíma í ár. Það jafngildir 131% raunvexti milli ára. Velta í hugbúnaðargerð nam 35,5 milljörðum króna á fyrstu fjórum mánuðum ársins og jókst um 7,3% að raunvirði á milli ára.
Þessi þróun endurspeglar aukið vægi gagna, stafrænnar þjónustu og tæknilausna í íslensku atvinnulífi. Hún sýnir jafnframt að tækifæri Íslands liggja ekki síður í hugviti, þekkingu og sérhæfðum mannauði en hefðbundnum auðlindum.
Velta iðnaðar í heild nam 693 milljörðum króna á fyrstu fjórum mánuðum ársins og jókst um 2,2% að nafnvirði á milli ára. Að raunvirði dróst velta iðnaðar hins vegar saman um 2,9%. Þrátt fyrir vöxt í tækni- og hugverkaiðnaði mælist samdráttur í greininni í það heila um þessar mundir.
Í byggingarstarfsemi og mannvirkjagerð nam velta fyrstu fjóra mánuði þessa árs 199 milljörðum króna og jókst um 4,4% að nafnvirði milli ára en dróst saman um 0,8% að raunvirði. Það bendir til þess að umsvif í greininni hafi að mestu staðið í stað þegar tekið er tillit til verðlagsbreytinga. Innan greinarinnar sjást skýr merki um samdrátt bæði í uppbyggingu íbúða og atvinnuhúsnæðis.
Í framleiðsluiðnaði var samdrátturinn meiri. Velta nam 269 milljörðum króna á fyrstu fjórum mánuðum þessa árs samanborið við 286 milljarða króna á sama tímabili í fyrra. Það jafngildir 10,8% samdrætti að raunvirði. Afurðaverð hefur verið hátt en magn hefur dregist saman á milli ára, m.a. vegna bilunar í Norðuáli, sem skýrir samdráttinn.
