Malbikunarstöðin Höfði fari eftir sömu leikreglum og aðrir
„Við viljum að þetta fyrirtæki, sem vill svo til að er dótturfyrirtæki sveitarfélags, fari eftir sömu leikreglum og aðrir á markaði,“ segir Bjartmar Steinn Guðjónsson, viðskiptastjóri á mannvirkjasviði SI, í Morgunblaðinu um þá staðreynd að dótturfyrirtæki Reykjavíkurborgar, Malbikunarstöðin Höfði, geymi mengaðan jarðveg á lóð Sævarhöfða 6-10 í leyfisleysi. Bjartmar segir það koma spánskt fyrir sjónir að dótturfyrirtæki Reykjavíkur hafi aðgang að losunarsvæði miðsvæðis og sé þar af leiðandi í grennd við helstu byggingarframkvæmdir á höfuðborgarsvæðinu. Hann bendir á að önnur fyrirtæki í geiranum þurfi að leita mun lengra til þess að losa sig við mengaðan jarðveg.
Brot á lögum um meðhöndlun úrgangs
Í frétt Morgunblaðsins kemur fram að um sé að ræða brot á lögum um meðhöndlun úrgangs og að Morgunblaðið hafi greint frá því í síðustu viku að skipulagsfulltrúi Reykjavíkurborgar andmælti ekki beiðni skrifstofu framkvæmda og viðhalds hjá umhverfis- og skipulagssviði Reykjavíkurborgar um að mengað jarðvegsefni yrði geymt tímabundið á lóð á Sævarhöfða. Þá segir í fréttinni að til séu skýrar reglugerðir um það þegar verið er að losa eða endurvinna mengaðan jarðveg þurfi ásamt jákvæðri umsögn frá skipulagsfulltrúa Reykjavíkurborgar að fara í gegnum umsóknarferli hjá annaðhvort Umhverfisstofnun eða Heilbrigðiseftirliti Reykjavíkur.
Hafa ekki fengið leyfi frá Umhverfisstofnun og Heilbrigðiseftirliti Reykjavíkur
Í fréttinni kemur fram að í samskiptum Samtaka iðnaðarins við Umhverfisstofnun og Heilbrigðiseftirlit Reykjavíkur komi í ljós að skrifstofa framkvæmda og viðhalds hefði ekki fengið leyfi frá ofangreindum stofnunum. Enn fremur komi fram í svari frá heilbrigðiseftirlitinu til SI að Reykjavíkurborg hafi fallið frá áformum um að setja upp losunaraðstöðu fyrir mengaðan jarðveg á svæðinu. Engu að síður er jarðvegurinn geymdur á svæðinu.
Morgunblaðið / mbl.is, 3. nóvember 2023
