Fréttasafn



4. feb. 2025 Almennar fréttir Iðnaður og hugverk Starfsumhverfi

Mikilvægt að vera í virku samtali við nágranna og vinaþjóðir

„Það sem skiptir máli er að við  tryggjum hagsmuni Íslands og íslensks útflutnings, að við séum þá hluti af Evrópusambandinu í þeim skilningi að við lendum ekki á milli Bandaríkjanna og Evrópusambandsins,“ segir Sigríður Mogensen, sviðsstjóri iðnaðar- og hugverkasviðs SI, í frétt Stöðvar 2 um mögulegt tollastríð milli Bandaríkjanna og Evrópusambandsins. 

Virkt samtal við nágranna og vinaþjóðir

Í fréttinni kemur fram að útflutningshagsmunir til Evrópu séu stærri en til Bandaríkjanna, heildarútflutningur til ESB séu tæplega 400 milljarðar á ári en um 40 milljarðar til Bandaríkjanna. „Það skiptir máli að við séum í virku samtali við okkar nágranna og vinaþjóðir sem eiga sambærilegra hagsmuna að gæta og Noregur er besta dæmið um slíkt ríki.“ 

Versta sviðsmyndin að lenda í tollahækkunum á báða bóga

Sigríður segir að tryggja þurfi hagsmuni Íslands í samhengi við EES. „Slíkt samtal sé þegar hafið bæði á vettvangi atvinnulífs og utanríkisstjórnmála. Versta sviðsmyndin er auðvitað sú að við lendum í tollahækkunum á báða bóga, ég held að það sé óhugsandi, það er mjög ólíklegt sviðsmynd. Ef við höldum rétt á spilunum þá mun hún ekki verða að veruleika.“

Vera taktísk en ekki hafa okkur mikið í frammi

Þá kemur fram í frétt Stöðvar 2 að á næstu vikum þurfi að fylgjast vel með fyrirætlunum Trumps og mótvægisaðgerðum ESB. „Við skulum ekki hafa okkur of mikið í frammi, við þurfum að vera mjög taktísk en við þurfum að passa upp á okkar hagsmuni beggja megin borðsins.“

Hér er hægt að nálgast fréttina í heild sinni.

Sigríður Mogensen, sviðsstjóri iðnaðar- og hugverkasviðs SI.