Minnkandi samkeppnishæfni fyrirtækja
Versnandi afkoma og minnkandi samkeppnishæfni fyrirtækja á Íslandi kemur skýrt fram í nýbirtum tölum embættis ríkisskattstjóra yfir álagningu opinberra gjalda á lögaðila. Þetta segir Sigurður Hannesson, framkvæmdastjóri Samtaka iðnaðarins, í Markaðnum í dag.
Í fréttinni kemur fram að ríkisskattstjóri hafi birt helstu tölur yfir álagningu opinberra gjalda á lögaðila vegna rekstrarársins 2017 í síðustu viku. Stærstu breytingarnar snerta tekjuskatt lögaðila, sem lækka um 5,6 milljarða króna og tryggingagjald, sem hækkar um 5,9 milljarða króna. Sigurður segir tölurnar draga upp mjög skýra mynd. „Samdráttur tekjuskatts lögaðila segir okkur að afkoma fyrirtækja hafi heilt yfir verið verri á síðasta ári en hún var á árinu þar á undan. Hækkun tryggingagjaldsins segir okkur að á sama tíma og afkoman versnaði hafi opinberar álögur á fyrir tækin aukist.“
Slæmar fréttir fyrir hagkerfið
Sigurður segir jafnframt að þetta sé ein birtingarmynd þess hvernig hafi dregið úr samkeppnishæfni íslensks efnahagslífs á undanförnum árum. Hækkun tryggingagjaldsins, sem er hlutfall af launakostnaði, bendi einnig til þess að launahækkanir undanfarinna ára hafi haft áhrif á afkomu fyrirtækja og að launþegar séu að taka stærri hluta af kökunni en áður. Sigurður telur að þessi þróun mála hafi haldið áfram á árinu 2018. „Það bendir margt til þess að afkoma fyrirtækja sé heilt yfir lakari í ár en í fyrra. Við sjáum áframhaldandi þróun í þessa átt sem eru mjög slæmar fréttir fyrir hagkerfið.“
Í fréttinni segir að í fjárlögum sé reiknað með að tryggingagjaldið skili ríflega 100,8 milljörðum króna á næsta ári sem er tæplega 3,5 milljörðum krónum meira en á þessu ári, þrátt fyrir boðaða lækkun upp á 0,25 prósentustig.
Markaðurinn / Frettabladid.is, 3. október 2018.