Kjörís 40 ára
Kjörís fagnaði fjörtíu ára afmæli sínu með mikilli afmælishátíð í Hveragerði laugardaginn 29. ágúst. Að sögn Guðrúnar Hafsteinsdóttur, markaðsstjóra Kjöríss komu á bilinu 13-15 þúsund manns og gæddu sér á eins miklum ís og hver gat í sig látið. Mesta athygli vöktu þó ólíkindabrögðin svokölluðu en boðið var upp á túnfiskís, ORA grænar baunirís, kreppuís, Jalapenoís og margt fleira. „Vinsælastur var þó gamli góði vanilluísinn” segir Guðrún og bætir því að víst sé að allir hafi fundið ís við hæfi þennan sólríka dag í Hveragerði.
Í tilefni afmælisins var tónleikadagskrá á sviði þar sem tónlistarfólk úr Hveragerði steig á stokk og skemmti. Hápunkturinn var síðan þegar Kjöríssöngkonan var gerð opinber og söng í fyrsta sinn opinberlega lag Magnúsar Þórs Sigmundssonar sem hljómað hefur á árinu í afmælisauglýsingu Kjörís. Kjöríssöngkonan er Klara úr Nylon og sló hún rækilega í gegn á afmælishátíðinni og söng sig inn í hjörtu viðstaddra með einstaklega fallegum flutningi á lagi Magnúsar.
„Með þessu framtaki viljum við hjá Kjörís þakka landsmönnum öllum áralanga tryggð við Kjörís. Við lítum björtum augum til framtíðar“ sagði Guðrún að lokum.