Teknís og Leifur Breiðfjörð listamaður í samstarfi
Listamaðurinn Leifur Breiðfjörð vinnur að miklu málm- og glerlistaverki sem verður staðsett í St. Giles dómkirkjunni í Edinborg. Málmiðnaðarfyrirtækið Teknís í Garðabæ vinnur að gerð verksins með honum.
St. Giles dómkirkjan er eitt af kennimerkjum Edinborgar og fjölsóttur ferðamannastaður. Yfir innganginum í kirkjunni trónir glerlistaverk eftir Leif til minningar um þjóðskáld Skota, Robert Burns, og hefur það fyrir löngu haslað sér völl sem eitt merkasta listaverk Skotlands. Nýja verkið sem hann vinnur nú að verður staðsett fyrir neðan glermyndina og verður hluti af innganginum í kirkjuna.
Málmhluti þessa nýja listaverks er viðamikið og vinnslan mjög vandasöm bæði listrænt og tæknilega séð. Málmiðnaðarfyrirtækið Teknís vinnur verkið og beitir við það tölvustýrðum tæknibúnaði. Fyrirtækið var eftir vandlega skoðun valið úr hópi innlendra og erlendra fyrirtækja til verksins enda uppfyllir það allar þær kröfur sem gerðar eru til þess að vinna svo flókið og vandasamt verkefni.
Listaverkið verður svo sent til Skotlands innan skamms og það sett upp í þessari fornfrægu kirkju.