Rannsóknarþjónustan Sýni hefur opnað Matvælaskóla
Matvælafræðingar og ráðgjafar hjá Sýni halda námskeið sem fjalla um matvæli og meðhöndlun þeirra frá öllum hliðum, allt frá frumframleiðslu til neytanda. Námsefnið nær einnig yfir hollustu og fjölbreytta notkun matvæla og hráefnaval. Matvælaskólinn hjá Sýni er fyrir einstaklinga og hópa. Kennslan fer fram hjá Sýni, Lynghálsi 3. Einnig er boðið upp á námskeið í fyrirtækjum og stofnunum og er þá námsefnið aðlagað að þörfum hvers hóps fyrir sig.
Námsefnið er unnið af ráðgjöfum sem starfað hafa í mörg ár í matvælaiðnaði og byggir á áralangri reynslu þeirra af námskeiðahaldi, rannsóknarstörfum og samstarfi við fyrirtæki og fagmenn.
Dæmi um námskeið
Stofnun matvælafyrirtækja – Framtakið fékk styrk frá Starfsmenntaráði
Gæði og öryggi alla leið – HACCP námskeið
Gæði og öryggi í matreiðslu
Hollusta og matseld sem hópefli fyrir vinnustaði og vinahópa
Krydd í tilveruna
Gæðastjórnun í matvælaiðnaði – 190 stunda nám
Hollar kjötvörur – Unnar kjötvörur geta líka verið hollar
Krakkamatur – Hollur og bragðgóður
Innri úttektir / Sannprófun á gæðakerfum matvælafyrirtækja
Framhaldsnám – Gæðastjórnun í matvælaiðnaði
Einnig verður boðið upp á nám fyrir almenna starfsmenn í matvælafyrirtækjum og er stefnt að því að það nám verði metið til eininga á framhaldsskólastigi. Námsskráin er unnin í samstarfi við Starfsafl fræðslusjóð, Fræðslumiðstöð atvinnulífsins, Eflingu stéttafélag, Landsmennt fræðslusjóð og Matvælastofnun.
Í framhaldi af því er hægt bæta við námskeiðum til að almennir starfsmenn verði hæfari til að vinna að/stjórna gæðamálum í matvælafyrirtækjum.
Nánari upplýsingar um námskeiðin má finna á vefsíðu Sýnis.