EVE Online frumlegasti leikur ársins 2010
Netleikurinn EVE Online hefur verið valinn frumlegasti leikur ársins 2010 af lesendum leikjavefsíðunnar MMORPG.com. Lesendurnir fengu tækifæri til þess að kjósa á milli fimm leikja og hlaut EVE Online 32,7% allra atkvæða.
Á síðunni kemur fram að lesendum þykir tölvuleikurinn skara fram úr hvað varðar tækni og þróun sýndarveruleikaheimsins á netinu sem gerir það að verkum að notendur verða dyggir aðdáendur og sífellt fleiri bætast í hópinn.
Þá er einnig minnst á EVE Online keppnina sem haldin verður í sjöunda sinn í Reykjavík helgina 24. til 26. mars. Þar fá notendur allstaðar að úr heiminum tækifæri til að hittast, spjalla við framleiðendur, skemmta sér og kynnast Íslandi.