Fjallað um málm í fyrsta hádegiserindi Toppstöðvarinnar og SI
Fyrsta hádegiserindi Toppstöðvar og Samtaka iðnaðarins fór fram í dag í húsnæði Toppstöðvarinnar. Daníel Óli Óðinsson, framkvæmdastjóri Járnsmiðju Óðins fjallaði um málm og eiginleika hans, framboð til framtíðar, vinnslumöguleika, horfur og þróun. Mæting var góð og greinilega mikill áhugi hjá hönnuðum að fræðast um málm.
Í erindaröðinni verður tekið fyrir eitt hráefni í mánuði, s.s. málmur, gler og timbur. Sérfræðingur úr framleiðsluiðnaði varpar ljósi á hráefnið, eiginleika þess, framboð til framtíðar, vinnslumöguleika, horfur og þróun.
Í lok hvers erindis gefst svigrúm til fyrirspurna og umræðu.
Markmiðið með erindaröðinni er að efla vitund um innlenda framleiðslumöguleika og stuðla að þverfaglegu samstarfi. Hönnuðir og iðnaðarmenn eru sérstaklega hvattir til að koma en allir eru velkomnir.