Ný skýrsla SI með 33 tillögum að umbótum
Samhliða Iðnþingi 2021 gefa Samtök iðnaðarins út nýja skýrslu þar sem lagðar eru fram 33 tillögur að umbótum sem ráðast þarf í á næstu 12 mánuðum. Með þessari skýrslu vilja samtökin leggja sitt af mörkum til umræðunnar í aðdraganda kosninga.
Í skýrslunni segir að miklu máli skipti að ákvarðanir nýrra stjórnvalda leiði til umbóta á Íslandi, bæði fyrir fólk og fyrirtæki og að á næstu 12 mánuðum verða teknar ákvarðanir sem munu ráða miklu um efnahagslega framtíð á Íslandi næstu ár og áratugi. Kólnun hagkerfisins var staðreynd fyrir heimsfaraldur kórónuveiru. Farsóttin reynist hinu opinbera mjög kostnaðarsöm og nemur aukning skulda hátt í milljarði króna á hverjum virkum degi. Eftir skynsama hagstjórn undanfarinna ára er ríkissjóður vel í stakk búinn að taka á sig auknar byrðar en að lokum kemur að skuldadögum. Leið vaxtar – að veita atvinnulífinu svigrúm til að skapa aukin verðmæti og ný og eftirsótt störf – er farsælasta leiðin. Leið skattlagningar mun hefta vöxt atvinnulífs og tefja endurreisnina. Með því að slíta fjötrana semmhalda aftur af atvinnulífinu með markvissum hætti á næstu mánuðum verður hægt að hraða uppbyggingu og skapa ný og eftirsótt störf og aukin verðmæti. Verðmætasköpun sem byggir á öflugu, fjölbreyttu og samkeppnishæfu atvinnulífi er forsenda góðra lífskjara. Samkeppnishæfni íslensks iðnaðar ræðst að miklu leyti af þeirri umgjörð sem stjórnvöld skapa. Samtök iðnaðarins, sem hreyfiafl í íslensku samfélagi, vilja vinna með stjórnvöldum að umbótum til hagsbóta fyrir iðnaðinn, atvinnulífið og almenning í landinu. Með umbótum í menntun, innviðum, nýsköpun, starfsumhverfi og orku- og umhverfismálum eykst framleiðni sem leiðir til hagsældar.
Í skýrslunni segir að verkefni hagstjórnar á næsta kjörtímabili eða til ársins 2025 sé að skapa nægan hagvöxt til að ná atvinnuleysinu niður á ásættanlegt stig og auka efnahagsleg lífsgæði þjóðarinnar. Til þess að þetta verði að veruleika verði að ráðast í aðgerðir strax. Auka þarf gjaldeyristekjur, verðmætasköpun og fjölga störfum í einkageiranum. Efla verður samkeppnishæfni með áherslu á þá þætti sem helst eru til þess fallnir að örva verðmætasköpun fyrirtækja í landinu og leiða til fjölgunar starfa. Ef ná á atvinnuleysi niður í 3,5% árið 2025, þ.e. niður í viðlíka hlutfall og það var á árinu 2019, þarf að jafnaði 4,2% hagvöxt á ári á næsta kjörtímabili. Fjölga þarf störfum á tímabilinu um rétt ríflega 29 þúsund og landsframleiðsla þarf að aukast um 545 milljarða króna yfir tímabilið. Rétt er að leggja áherslu á að þessi verðmætasköpun og raunar fjölgun starfa þarf að eiga sér stað í einkageiranum og með aukningu gjaldeyristekna. Auka þarf gjaldeyristekjur um 300 milljarða króna yfir tímabilið eða sem nemur ríflega 1,4 ma.kr. á viku. Takist þetta munu efnahagsleg lífsgæði landsmanna aukast á tímabilinu og landsframleiðsla á mann verður meiri á árinu 2025 en hún var á árinu 2019, fyrir efnahagsáfallið sem fylgdi heimsfaraldrinum.
Hér er hægt að nálgast skýrsluna.