Ný stjórn Mannvirkis - félags verktaka
Ný stjórn Mannvirkis - félags verktaka var kosin á aðalfundi félagsins sem fór fram í Húsi atvinnulífsins sl. föstudag. Í nýrri stjórn sitja Sigþór Sigurðsson hjá Colas Ísland, formaður, Gylfi Gíslason hjá Jáverki, varaformaður, Karl Andreassen hjá Ístaki, Einar Hrafn Hjálmarsson hjá Íslenskum aðalverktökum og Sveinn Hannesson hjá Jarðborunum.
Á fundinum fór Sigþór Sigurðsson, formaður félagsins, með skýrslu stjórnar yfir störf félagsins á liðnu starfsári. Meðal mála sem farið var yfir voru réttindamál í byggingariðnaði, endurskoðun byggingarreglugerðar, endurskoðun ÍST30, byggingarvísitalan og stærri viðburðir starfsársins, s.s. Mannvirkjaþing SI og Útboðsþing SI sem félagið heldur í samstarfi við SI og Samtök innviðaverktaka.
Nýr formaður greindi frá því að á komandi starfsári yrði m.a. lögð áhersla á innviðamál og stöðugleika á markaði, orkuskipti og umhverfismál, hringrásarhagkerfið og öryggismál.
Þegar hefðbundnum aðalfundarstörfum lauk var innviðaráðherra, Svandís Svavarsdóttir, gestur fundarins og átti samtal við fundargesti.
