Ný stjórn Rafmenntar
Ný stjórn var skipuð á aðalfundi Rafmenntar sem fór fram 28. maí en í henni sitja Jakob Tryggvason (RSÍ) formaður, Pétur Hákon Halldórsson (SART) varaformaður, Andri Jóhannesson (RSÍ), Andri R. Haraldsson (RSÍ), Róbert Jensson (SART), Hjörleifur Stefánsson (SART), Margrét Halldóra Arnarsdóttir (RSÍ) og Guðni Einarsson (SART). Varamenn í stjórn eru Elma Guðmundsdóttir (RSÍ) og Kristján D. Sigurbergsson (SART). Úr stjórn gengu Hjörtur Árnason og Ragnar G. Gunnarsson og voru þeim þökkuð vel unnin störf.
Samkvæmt ársskýrslu stjórnar einkenndist árið af aukinni þátttöku í námi og endurmenntun, fjölgun í sveinsprófum og öflugri uppbyggingu nýrra verkefna sem styðja við hæfniþróun og öryggi innan rafiðnaðarins. Ársskýrsla Rafmenntar sýnir að áhugi fyrirtækja og starfsfólks á menntun og hæfniþróun fer vaxandi. Fjölgun þátttakenda í námi, aukinn fjöldi sveina og uppbygging nýrra verkefna á borð við Öryggisskóla iðnaðarins undirstrika mikilvægi markvissrar starfsmenntunar fyrir framtíð atvinnulífsins.
Fyrir fyrirtæki í iðnaði er aðgangur að vel menntuðu og hæfu starfsfólki ein af grunnforsendum samkeppnishæfni. Þróun síðasta árs sýnir að öflugt samstarf atvinnulífs og fræðsluaðila skilar árangri og styrkir getu íslensks iðnaðar til að mæta síbreytilegum kröfum tæknivædds samfélags.
Aukin aðsókn að námi og námskeiðum
Mikil áhersla var lögð á endurmenntun og símenntun á árinu. Aðsókn í meistaraskóla Rafmenntar jókst milli ára og ekki hafa fleiri stundað nám við meistaraskólann frá 2021. Jafnframt útskrifuðust 59 nemendur úr meistaraskóla á árinu og samkvæmt upplýsingum frá HMS tóku 56 einstaklingar út löggildingu rafverktaka. Þátttaka á námskeiðum jókst einnig verulega. Á árinu voru haldin 118 námskeið með samtals 1.405 þátttakendum. Rafmennt hefur jafnframt markvisst unnið að því að þróa ný námskeið í takt við þarfir atvinnulífsins og hraða tækniþróun.
Bransadagurinn orðinn fastur liður
Bransadagurinn var haldinn í annað sinn 6. janúar og sóttu viðburðinn yfir 300 gestir. Á dagskrá voru 25 fyrirlestrar innlendra og erlendra sérfræðinga auk sýningarsvæðis þar sem fyrirtæki kynntu vörur og þjónustu sína. Að sögn stjórnar hefur viðburðurinn fest sig í sessi sem mikilvægur vettvangur fyrir fagfólk í greininni.
Öryggisskóli iðnaðarins tók til starfa
Eitt af stærstu verkefnum ársins var stofnun Öryggisskóla iðnaðarins sem Rafmennt og Iðan fræðslusetur reka í sameiningu. Á árinu var ráðinn leiðtogi verkefnisins, unnið að mótun námsframboðs og farið í heimsóknir til sambærilegra skóla erlendis. Fyrstu námskeiðin voru haldin um haustið með þátttöku stjórnenda fyrirtækja sem komu að þróun starfseminnar.
Fjölgun iðnnema og sveina
Nemastofa atvinnulífsins, sem Rafmennt kemur að, hélt áfram að styðja við vinnustaðanám og kynningu iðngreina. Á haustönn voru 705 fyrirtæki með nema í vinnustaðanámi og alls luku 980 iðnnemar sveinsprófi á árinu, sem er mesti fjöldi nýsveina sem lokið hefur námi hér á landi. Þar af luku 296 einstaklingar sveinsprófi í rafiðngreinum. Sveinspróf í rafvirkjun voru einnig fjölmennari en áður. Alls þreyttu 429 einstaklingar prófið á árinu, sem er veruleg aukning frá fyrri árum og endurspeglar vaxandi áhuga á námi og störfum í rafiðnaði.
Framhaldsskóli Rafmenntar tók við starfsemi Kvikmyndaskóla Íslands
Miklar breytingar urðu þegar Rafmennt keypti þrotabú Kvikmyndaskóla Íslands og tók yfir nemendur og búnað skólans. Með skjótum viðbrögðum tókst að tryggja áframhald náms allra nemenda og útskrift þeirra sem voru á lokaönn. Á skólaárinu 2025–2026 voru 62 nemendur skráðir í nám við skólann.
Guðni Einarsson, Pétur H. Halldórsson, Þór Pálsson, Kristján D. Sigurbergsson, Jakob Tryggvason, Elma Guðmundsdóttir og Andri Jóhannesson.