Nýsköpunarstefna SI
Samtök iðnaðarins kynntu nýsköpunarstefnu samtakanna í Iðnó í gær fyrir fullum sal. Í stefnu samtakanna eru sett fram fjögur markmið til að unnt verði að ná fram metnaðarfullri framtíðarsýn um að á Íslandi verði skilyrði til nýsköpunar með því besta sem þekkist í heiminum.
- Auka fjárfestingu í rannsóknum og þróun og framboð áhættufjármagns til vaxtarfyrirtækja
- Auka framboð af sérfræðingum
- Einfalda og efla stuðningsumhverfi
- Efla kynningar- og markaðsstarf
Í stefnunni eru settar fram tillögur að því hvernig ná má fram ofantöldum markmiðum, meðal annars með því að setja á laggirnar tækniyfirfærsluskrifstofu (Technology Transfer Office), ráðast að veikleikum sem snúa að sölu og markaðssetningu, fjölga sérfræðingum og hátæknimenntuðum, afnema þök á endurgreiðslur vegna rannsókna- og þróunarverkefna, bjóða skattaívilnanir til einstaklinga vegna fjárfestinga í fyrirtækjum í vexti að breskri fyrirmynd og leggja lægri skattprósentu á tekjur fyrirtækja sem koma til vegna skráðra hugverka.
Á fundinum fluttu framsögu Guðrún Hafsteinsdóttir, formaður SI, Sigurður Hannesson, framkvæmdastjóri SI, Sigríður Mogensen, sviðsstjóri hugverkasviðs SI, og María Bragadóttir, fjármálastjóri Efni. Í pallborðsumræðum tóku þátt Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, Guðbjörg Heiða Guðmundsdóttir, framkvæmdastjóri Marel á Íslandi, og Frosti Ólafsson, forstjóri ORF Líftækni.
Hér er hægt að nálgast glærur fundarins.
Hér er hægt að nálgast nýsköpunarstefnu SI.
MYNDIR
Á SI Facebook er hægt að skoða fleiri myndir frá fundinum. Á mbl.is er hægt að skoða fleiri myndir.
Fjölmennt var á fundinum.
Jóhanna Vigdís Arnardóttir, verkefnastjóri menntamála hjá SI, var fundarstjóri.
Guðrún Hafsteinsdóttir, formaður SI, flutti ávarp.
Sigurður Hannesson, framkvæmdastjóri SI, talaði um nýsköpunarlandið Ísland.
Sigríður Mogensen, sviðsstjóri hugverkasviðs SI, greindi frá nýsköpunarstefnu SI.
María Bragadóttir, fjármálastjóri Efni, fór yfir hvað felst í Patent Boxi.
Sigríður Mogensen stýrði pallborði þar sem voru Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, Guðbjörg Heiða Guðmundsdóttir, framkvæmdastjóri Marel á Íslandi, og Frosti Ólafsson, forstjóri ORF Líftækni.
Frosti, Þórdís Kolbrún og Guðbjörg Heiða í pallborðinu.