Óraunhæft að hið opinbera geti fjármagnað allt sem þarf
„Sterkir innviðir eru nauðsynlegir til þess að atvinnulífið geti blómstrað um land allt. Þá er ég að vísa í samgöngur, fjarskipti, gagnatengingar og raforku sem þarf að vera trygg alls staðar, sem er ekki raunin í dag,“ segir Sigurður Hannesson, framkvæmdastjóri SI, í viðtali Viðskiptablaðsins. „Almennt erum við mjög hlynnt því að einkaaðilar komi að fjármögnun einstakra verkefna og höfum bent á svokallaðar PPP lausnir í þeim efnum, sem stendur fyrir „public private partnership“ á ensku. Það þýðir að einkaaðilar koma að slíkum verkefnum enda er í mínum huga algerlega óraunhæft að hið opinbera geti fjármagnað allt sem þarf að gera á ásættanlegum tíma. Við höfum líka séð áhuga innlendra sem og erlendra fjárfesta á því að fjármagna framkvæmdir af þessum toga. Stjórnvöld þurfa í samstarfi við atvinnulífið að vera miklu duglegri að gera áætlanir lengra inn í tímann og taka meira tillit til hagsveiflunnar. Það er áhugavert að þó að það sé þensla á mörgum sviðum, þá eru undantekningar á því. Nýlegar fréttir af útboði á gatnaframkvæmdum á höfuðborgarsvæðinu eru ágætt dæmi, þar sem tilboð voru langt undir kostnaðaráætlun, sem segir okkur að hagkvæmt er að ráðast í frekari framkvæmdir. Fjárfesting í dag er hagvöxtur á morgun. Það hefur verið of lítið fjárfest í innviðum á síðustu árum sem mun koma niður á okkur í framtíðinni ef við bætum ekki úr. Við verðum að ráðast í þessa uppbyggingu til að styðja við hagvöxt framtíðarinnar.“
Viðskiptablaðið, 31. ágúst 2017.