Pípulagningameistarar vilja nýja nálgun í hitun húsa
Yfirstandandi jarðhræringar á Reykjanesinu og sviðsmyndir sem ógnað hafa rekstri orkuversins á Svartsengi hafa vakið fjölmarga pípulagningameistara til umhugsunar um hvernig við hönnum lagnakerfi, enda sér Svartsengi yfir 12.000 heimilum og atvinnurekendum á Reykjanesinu fyrir húshitun. Þetta segir Böðvar Ingi Guðbjartsson, formaður Félags pípulagningameistara, í grein sem birt er á Vísi. Hann segir að Félag pípulagningameistara sé tilbúið að leggja sitt af mörkum við endurskoðun á þessu verklagi enda kalli ný sviðsmynd á nýja nálgun.
Endurhugsa þarf hönnun og uppsetningu lagnakerfi sem nýta jarðvarma til upphitunar
Í greininni segir Böðvar að við búum hér á landi við þau miklu forréttindi að geta notast við jarðvarma við upphitun húsa. Ákvörðun um að ráðast í þetta mikla verkefni hafi á sínum tíma verið aðdáunarverð og gjörbreytti lífsgæðum almennings. Með tímanum höfum við þó orðið góðu vön og þyki stöðugur aðgangur að jarðvarma þar sem hann sé til staðar orðinn sjálfsagður. Hann segir að sviðsmyndin sem snúi að hitun húsa hafi tekið á sig aðra mynd og kalli á endurhugsun á því hvernig við hönnum og setjum upp lagnakerfa í mannvirkjum sem nýti jarðvarma til upphitunar. Taka þurfi með í reikninginn að orkuverin geti lent í vanda eins og raungerðist á Reykjanesinu. Jarðhræringar hafi tekið lagnir í sundur og reynt sé að verja orkuverið með varnargörðum fyrir mögulegu eldgosi sem ógnað geti starfseminni.
Þarf að vera hægt að breyta um orkugjafa ef orkuverin lenda í vanda
Böðvar segir að með lítilli fyrirhöfn þurfi að vera hægt að koma í veg fyrir að lagnir húsnæða frostspringi enda valdi slíkt gríðarlegu tjóni á mannvirkjum. Tækjarými framtíðarinnar í mannvirkjum ættu því að vera þannig útbúin að hægt verði að tengja við þau rafmagns- eða gashitakúta, olíu eða sambærilegu með lítilli fyrirhöfn. Allar lagnir ættu að vera á lokuðum kerfum með frostlegi vegna þess að þegar hitastig utandyra fer niður fyrir frostmark muni það ná til lagnakerfa á skömmum tíma. Vatnið hafi þann eiginleika að þegar það byrji að frjósa þenst það út og lagnir og ofnar verði fyrir frostskemmdum. Hann segir að tækjarými framtíðarinnar þurfi að taka mið af þessu og þurfi að vera þannig útbúin að hægt verði með lítilli fyrirhöfn að breyta um orkugjafa ef orkuverin lendi í vanda. Slíkt kalli á breytta hitamenningu þeirra sem starfa við pípulagnir ásamt hönnuðum lagnakerfa og vissulega aðkomu stjórnvalda við endurskoðun regluverks.
Leiðbeiningar fyrir neytendur til að koma í veg fyrir vatnstjón
Þá segir Böðvar í greininni að árið 2003 hafi Rannsóknarstofnun byggingariðnaðarins gefið út RB blað um vatnsveitu-, hitaveitu- og fráveitulagnir í dreifbýli sem vert sé að endurskoða í ljósi stöðunnar en taka mætti mið af þeim upplýsingum sem þar komi fram til að koma í veg fyrir vatnstjón. Félag pípulagningameistara hafi einnig unnið einfaldar leiðbeiningar fyrir neytendur um hvernig hægt sé að koma í veg fyrir vatnstjón sem finna megi á heimasíðu félagsins.
Hér er hægt að nálgast grein sem formaður FP, Böðvar Ingi Guðbjartsson, skrifar á Vísi.
Hér er hægt að nálgast viðtal við formann FP sem var í Reykjavík síðdegis á Bylgjunni.
Hér er hægt að nálgast viðtal við formann FP sem var í Síðdegisútvarpinu á Rás 2.
Á vef FP er hægt að nálgast leiðbeiningarnar.