Rætt um hæft vinnuafl fyrir nýjar atvinnugreinar
Hvernig tryggjum við að Ísland hafi hæft vinnuafl fyrir nýjar atvinnugreinar sem spretta upp í takti við tækniframfarir og sjálfbærni? Þessari spurningu var varpað fram til umræðu á málstofu á Menntadegi atvinnulífsins sem haldinn var í samstarfi Samtaka iðnaðarins, Samorku og Samtaka fyrirtækja í sjávarútvegi.
Skortur á hæfu vinnuafli í nýjum atvinnugreinum
Sigurgeir Björn Geirsson, verkefnastjóri Búrfellslundar hjá Landsvirkjun, ræddi um ný störf sem skapast við uppbyggingu vindorkuvera og þær áskoranir sem fylgja því að manna þau. Karen Ósk Pétursdóttir, mannauðsstjóri Arnarlax, lagði áherslu á að skortur sé á sérhæfðu vinnuafli í landeldi og sjóeldi, þar sem þörf er á nýrri þekkingu í greininni. Bergþóra Halldórsdóttir frá Borealis Data Center vakti athygli á skorti á menntuðu starfsfólki í gagnaverum með færni í varmakælingu, gagnaöryggi, netöryggi og öðrum tengdum þáttum.
Þverfaglegt samstarf lykilatriði
Í pallborðsumræðum tóku þátt Víðir Reynisson, þingmaður Samfylkingarinnar, Hildur Ingvarsdóttir, skólameistari Tækniskólans, og Jón Pétur Zimsen, þingmaður Sjálfstæðisflokksins. Þau ræddu hvernig menntakerfið og atvinnulífið geti betur unnið saman að því að búa nemendur undir störf framtíðarinnar.
Hildur lagði áherslu á að menntakerfið verði að laga sig hratt að breyttum þörfum atvinnulífsins og að aukin áhersla þurfi að vera á tæknimenntun og sérhæfingu. Þingmennirnir tóku undir mikilvægi þess að tryggja sveigjanleika í menntakerfinu og stuðla að því að ungt fólk og starfandi einstaklingar geti tileinkað sér nýja færni.
Á Facebook SI er hægt að nálgast fleiri myndir frá Menntadegi atvinnulífsins.
Myndir/BIG
Lovísa Árnadóttir hjá Samorku stýrði umræðunum.
Bergþóra Halldórsdóttir.
Jón Pétur Zimsen, Víðir Reynisson og Hildur Ingvarsdóttir.
Bryndís Haraldsdóttir.
Erla Tinna Stefánsdóttir.