Samningur um aðgang nemenda og kennara í rafiðn að staðli
Staðlaráð Íslands og RAFMENNT hafa gert með sér samning sem auðveldar nemendum og kennurum verkmenntaskóla í rafiðnum aðgang að staðlinum ÍST 200 um raflagnir bygginga. RAFMENNT gerir samninginn fyrir hönd Samtaka rafverktaka, SART, og Rafiðnaðarsambands Íslands, RSÍ. Staðlaráð Íslands gerir samninginn fyrir hönd Fagstaðlaráðs í upplýsingatækni, FUT.
Í samningnum felst að RAFMENNT greiðir fyrir rafrænan aðgang nemenda og kennara að staðlinum. Aðgangurinn er í gegnum vefsíðu og byggist á notandanafni og lykilorði og varir meðan nemandi þarf á staðlinum að halda í námi sínu.
Það voru Helga Sigrún Harðardóttir, framkvæmdastjóri Staðlaráðs, og Þór Pálsson, framkvæmdastjóri RAFMENNTAR, sem undirrituðu samninginn.
Kristján Daníel Sigurbergsson, framkvæmdastjóri SART, og Kristján Þórður Snæbjörnsson, formaður RSÍ, fagna undirrituninni en Kristján Daníel er fyrir miðri mynd í hvítri skyrtu og Kristján Þórður í blárri skyrtu fyrir miðri mynd.