Samtök íslenskra handverksbrugghúsa stofnuð
Samtök íslenskra handverksbrugghúsa voru nýlega stofnuð en aðild að samtökunum eiga 21 brugghús sem dreifast um allt land. Um er að ræða smærri áfengisframleiðendur á Íslandi sem gerja og framleiða áfengi í eigin framleiðslutækjum. Hvert um sig framleiðir á bilinu nokkur hundruð til eina milljón lítra á ári. Formaður samtakanna er Sigurður Snorrason hjá Rvk. Brewing Co. sem fljótlega hefur starfsemi í Skipholti í Reykjavík. Sigurður kynnti nýju samtökin á fundi hjá Samtökum iðnaðarins í vikunni.
Samtökin hyggjast standa vörð um hagsmuni handverksbrugghúsa með því að fylgja eftir nokkrum málum; að hér á landi verði smærri áfengisframleiðendum veittur afsláttur af áfengisgjaldi í samræmi við venjur og heimildir úr Evrópusambandinu, að framleiðendur fái að selja framleiðslu sína beint til almennings út úr verksmiðju sinni eins og tíðkast í öðrum Norðurlöndum þar sem ríkið hefur einkaleyfi á áfengissölu og samtökin vilja standa vörð um aðgengi handverksbrugghúsa með vörur sínar á bari og í verslanir ÁTVR.
Í vor er áformað að gefa út landakort sem sýnir staðsetningu handverksbrugghúsa umhverfis landið en handverksbrugghús eru staðsett í öllum fjórðungum landsins.
Aðilar að Samtökum íslenskra handverksbrugghúsa eru:
- Austri brugghús Egilsstaðir
- Bastard / brewpub Reykjavík
- Beljandi brugghús Breiðdalsvík
- Bjórsetur Íslands Hólar í Hjaltadal
- The Brothers Brewery Vestmannaeyjum
- Brugghús Steðja Borgarnes dreifbýli
- Brugghúsið Draugr Hvalfirði
- Bruggsmiðjan / Kaldi Árskógssandi
- Bryggjan Brugghús Reykjavík
- Dokkan brugghús Ísafirði
- Eimverk distillery Garðabæ
- Gæðingur Skagafirði
- Húsavík Öl Húsavík
- Jón Ríki brewery & restaurant Höfn í Hornafirði
- Malbygg Reykjavík
- RVK Brewing Co. Reykjavík
- Segull 67 brewery Siglufirði
- Smiðjan brugghús Vík í Mýrdal
- Ægir brugghús Reykjavík
- Ölverk Hveragerði
- Ölvisholt brugghús Selfoss dreifbýli