Skúlaverðlaunin fyrir lampaseríu úr gleri
Skúlaverðlaunin 2016 voru afhent í gær á fyrsta opnunardegi sýningarinnar Handverk og hönnun í Ráðhúsi Reykjavíkur. Almar Guðmundsson, framkvæmdastjóri SI, afhenti verðlaunin Sigrúnu Ólöfu Einarsdóttur fyrir lampaseríuna „Ljóma“. Sigrún hefur rekið glerblástursvinnustofuna Gler í Bergvík á Kjalarnesi í 36 ár og er ein af fremstu glerlistamönnum Íslands.
Skúlaverðlaunin eru kennd við Skúla Magnússon fógeta sem er frumkvöðull smáiðnaðar í Reykjavík og eru verðlaunin styrkt af Samtökum iðnaðarins.
Sýningin Handverk og hönnun stendur yfir í Ráðhúsi Reykjavíkur til 7. nóvember og eru þátttakendur 58 talsins. Þeir sem valdir voru til þátttöku í sýningunni gátu tilkynnt nýja vöru í verðlaunasamkeppnina um besta nýja hlutinn. Skilyrðin voru að hlutirnir máttu hvorki hafa verið til sýnis né sölu opinberlega fyrir sýninguna í Ráðhúsinu. Tæplega tuttugu tillögur bárust og faglega valnefnd skipuðu Hanna Dís Whitehead vöruhönnuður og Þóra Björk Schram textíllistamaður.
