Starfsmenn SI skrifa undir sáttmála gegn einelti og áreitni
Starfsmenn SI hafa skrifað undir sáttmála gegn einelti, áreitni og ofbeldi og taka þar með þátt í því að hafna öllu slíku á vinnustaðnum. Í sáttmálanum segir að öryggiskennd og góður starfsandi skipti sköpum fyrir vellíðan starfsmanna og að á vinnustaðnum eigi starfsmenn góð samskipti.
Í sáttmálanum kemur þetta fram:
- Við þekkjum stefnu og viðbragðsáætlun fyrirtækisins gegn einelti, kynferðislegri og kynbundinni áreitni og ofbeldi og erum meðvituð um skyldur okkar.
- Við líðum ekki einelti, áreitni eða ofbeldi, beitum því ekki og vitum að meðvirkni með geranda getur skaðað starfsmenn og vinnustað okkar.
- Við berum sameiginlega ábyrgð á vinnuumhverfinu og leggjum okkar af mörkum til að bæta það enn frekar.
- Við erum ólík, með mismunandi bakgrunn og lífsskoðanir, en sýnum hvert öðru virðingu í öllum samskiptum.
- Við skiljum að upplifun af samskiptum er mismunandi og gerum ekki lítið úr viðbrögðum og tilfinningum annarra.
- Við ræðum um framkomu sem okkur mislíkar og tökum upp varnir fyrir þá sem brotið er gegn.
- Við tökum tillit til ábendinga um að við getum bætt framkomu okkar.
- Við sýnum öðrum kurteisi og virðingu í öllum samskiptum.