Stórsýningin Verk og vit opnuð með formlegum hætti
Stórsýningin Verk og vit sem fram fer í Laugardalshöll hófst í gær og er þetta í fimmta sinn sem sýningin er haldin. Mikill fjöldi gesta sótti sýninguna heim fyrsta opnunardaginn en sýningin stendur fram á sunnudag.
Sigurður Hannesson, framkvæmdastjóri SI, flutti ávarp við opnun sýningarinnar auk þess sem Pawel Bartoszek, formaður skipulags- og samgönguráðs Reykjavíkurborgar flutti ávarp. Sigurður Ingi Jóhannsson, innviðaráðherra, opnaði síðan sýninguna formlega með því að klippa á borða fyrir framan sýningarsalinn.
Um 100 sýnendur taka þátt í sýningunni en hún er ætluð þeim sem koma að byggingaiðnaði, skipulagsmálum og mannvirkjagerð á ýmsum stigum, s.s. sveitarfélögum, verktökum, iðnaðar- og þjónustufyrirtækjum, menntastofnunum, hönnuðum og ráðgjöfum.
Fyrstu tveir dagarnir eru ætlaðir fagaðilum en um helgina býðst almenningi að heimsækja sýninguna. Síðasti sýningardagur er sunnudagurinn 27. mars.
Framkvæmdaraðili sýningarinnar er AP almannatengsl og samstarfsaðilar eru innviðaráðuneytið, Landsbankinn, BYKO, Reykjavíkurborg og Samtök iðnaðarins.
Á myndinni eru, talið frá vinstri, Jóhanna Klara Stefánsdóttir, sviðsstjóri mannvirkjasviðs SI, Sigurður Ingi Jóhannsson, innviðaráðherra, Sigurður Hannesson, framkvæmdastjóri SI, Pawel Bartoszek, formaður skipulags- og samgönguráðs Reykjavíkurborgar, og Elsa Giljan Kristjánsdóttir frá Verk og vit.
Myndir: Heiða Helgadóttir.
Á Facebook SI er hægt að nálgast fleiri myndir frá opnun sýningarinnar.
Sigurður Hannesson, framkvæmdastjóri SI.
Sigurður Ingi Jóhannesson, innviðaráðherra.
Pawel Bartoszek, formaður skipulags- og samgönguráðs Reykjavíkurborgar.
Áslaug Pálsdóttir, framkvæmdastjóri AP almannatengsla.
Innviðaráðherra Sigurður Ingi Jóhannesson og Elsa Giljan Kristjánsdóttir frá Verk og vit opnuðu sýninguna með formlegum hætti.