Tækniþróunarsjóður verði efldur
Það skítur skökku við að skv. fjármálaáætlun ríkisstjórnarinnar verða framlög til Tækniþróunarsjóðs lækkuð um 50 milljónir króna á hverju ári eins langt og áætlunin nær, í stað þess að efla sjóðinn. Á sama tíma hefur sjóðnum aldrei borist jafn margar styrkhæfar umsóknir með A einkunn og má búast við að þeim fjölgi með auknu atvinnuleysi. Þetta segir Íris Ólafsdóttir, formaður Samtaka sprotafyrirtækja, í grein sinni í Kjarnanum. Hún segir að ef litið sé á þróun síðustu 3ja ára megi sjá að árið 2017 hafi 43% styrkhæfra verkefna hlotið styrk en 2019 hafi hlutfallið verið komið niður í 27%. Það þýði að 73% af verkefnum með A einkunn hafi verið hafnað í fyrra, samtals 178 verkefnum. Íris segir holskeflu frambærilegs fólks með mikla sérþekkingu hafi misst vinnuna og nú sé gullið tækifæri fólgið í að búa svo um að auðvelt verði að stofna og reka ný fyrirtæki. Vonandi bíði þessara nýju fyrirtækja síðan aukin tækifæri til vaxtar með tilkomu Kríusjóðsins sem sé í vinnslu.
Þá segir Íris í grein sinni að styrkir til nýsköpunar sé ekki ölmusa, heldur fjárfesting í framtíðinni. Það verði með nýsköpun sem vandamál framtíðarinnar verði leyst og núna sé tími hugrekkis, að þora að taka þá stefnubreytingu sem þarf til að við getum gengið inn í framtíð þar sem hinn nýi hagvöxtur taki mið af heimsmarkmiðum Sameinuðu þjóðanna.
Á vef Kjarnans er hægt að lesa grein Írisar í heild sinni.