Þarf þjóðarsátt um aukna framleiðni og samkeppnishæfni
„Við höfum náð miklum lífskjarabata á síðustu áratugum en nú hefur orðið kyrrstaða sem þarf að rjúfa. Það gerum við með þjóðarsátt um aukna framleiðni og samkeppnishæfni. Til þess þarf stöðugt starfsumhverfi, öflugt menntakerfi, hvata til nýsköpunar, aðgang að orku, fyrirsjáanleika í stjórnsýslu og samkeppnishæf skilyrði til fjárfestinga,“ segir Sigurður Hannesson, framkvæmdastjóri SI, í frétt Morgunblaðsins og bendir einnig á að með því sé öllum atvinnugreinum gert kleift að skapa aukin verðmæti.
Í fréttinni kemur fram að í nýrri greiningu SI um samkeppnishæfni og framleiðni sé varað við því að auknar opinberar álögur á verðmætasköpun, fjárfestingu og atvinnustarfsemi geti dregið úr samkeppnishæfni fyrirtækja Í greiningunni sé ítrekað að mikilvægt verkefni hagstjórnar um þessar mundir sé að ná niður verðbólgu og skapa skilyrði fyrir lægri vöxtum en til lengri tíma sé það hins vegar aukin framleiðni sem skili bættum lífskjörum.
Áhyggjuefni að landsframleiðsla á mann hafi verið óbreytt frá 2018
Þá kemur fram í fréttinni að í greiningunni sé bent á að landsframleiðsla á mann hafi verið nær óbreytt frá árinu 2018. Sigurður segir þá þróun áhyggjuefni en bendir á að með vexti tækni- og hugverkaiðnaðar á síðustu árum hafi fleiri stoðum verið skotið undir íslenskt efnahagslíf og að vöxtur tækni- og hugverkaiðnaðar sýni hvaða tækifæri felast í því að byggja nýjar útflutningsstoðir á hugviti, þekkingu og nýsköpun þar sem framleiðni er há. „Ef rétt er á málum haldið getur greinin orðið verðmætasta útflutningsstoð þjóðarbúsins við lok áratugarins og lagt mikilvægan grunn að hærri landsframleiðslu á mann og auknum lífskjörum.“
Morgunblaðið, 19. júní 2026.
