Umhverfis- og auðlindafræði HÍ í samstarfi við atvinnulífið
Möguleikar meistaranema í umhverfis- og auðlindafræði í Háskóla Íslands til starfsnáms aukast til muna með samstarfssamningum sem námsleiðin hefur gert við við sex stofnanir, félagasamtök og fyrirtæki en Samtök iðnaðarins eru í þeim hópi. Sveinn Agnarsson, formaður námsstjórnar í umhverfis- og auðlindafræði, undirritaði samningana ásamt fulltrúum stofnananna og fyrirtækjanna sem sjást á myndinni sem Kristinn Ingvarsson tók.
Samstarfsaðilarnir eru auk Samtaka iðnaðarins, Orkustofnun, Orkuveita Reykjavíkur, Skipulagsstofnun, Sorpa og Umhverfis- og skipulagssvið Reykjavíkurborgar. Unnið er að samningum við fleiri stofnanir en fulltrúar Landgræðslu ríkisins og Náttúrufræðistofnunar voru einnig viðstödd fundinn.
Markmið starfsnámsins er að efla tengsl við atvinnulífið, veita nemendum innsýn í starfsemi sem tengist fagsviðum námsins og gera þeim kleift að takast á við hagnýt úrlausnaefni. Markmiðið er enn fremur að tryggja nemendum þjálfun undir faglegri handleiðslu reyndra stjórnenda hjá frjálsum félagasamtökum, opinberum stofnunum og fyrirtækjum sem tengjast umhverfis- og auðlindafræði.
Nánar um samstarfið á vef HÍ.