Umsóknum um verknám fjölgar
Þeim fjölgar sem sækja um verknám úr 12% í 17% nú þegar umsóknarfrestur um skólavist í framhaldsskólum fyrir haustið hefur runnið út. Þetta er fagnaðarefni fyrir Samtök iðnaðarins þar sem skortur er á iðnmenntuðu starfsfólki. Samtök iðnaðarins hafa með markvissum hætti beitt sér fyrir fjölgun iðnmenntaðra ekki síst með umbótum á náminu, með umfjöllun og kynningu á verk- og starfsnámi þar sem dregnir eru fram þeir fjölbreyttu möguleika sem slíkt nám felur í sér. Þar má nefna til dæmis að námið er alþjóðlegt og gefur möguleika á að starfa í öðrum löndum, atvinnuhorfur eru góðar, um er að ræða almennt vel launuð störf auk þess sem námið gefur möguleika á að fara fyrr út á vinnumarkaðinn og jafnvel starfa sem sjálfstæður atvinnurekandi.
650 sækja um verknám
Á vef mennta- og menningarmálaráðuneytisins kemur fram að samkvæmt tölum frá Menntamálstofnun höfðu rúmlega 3.800 nemendur skilað inn sínum umsóknum um miðja síðustu viku. Vísbendingar séu um að fjölgun sé í umsóknum um verknám en af fyrstu tölum megi sjá að 17% þeirra sem sóttu um skólavist fyrir haustið hafa valið sér verknámsbrautir sem sitt fyrsta val. Í fyrra innrituðust 12% nemenda á verk- eða starfsnámsbrautir. Mest virðist aðsóknin vera í rafiðngreinar en einnig í málm- og byggingagreinar.
Haft er eftir Lilju Alfreðsdóttur, mennta- og menningarmálaráðherra, að þetta séu ánægjulegar fréttir.
„Við höfum beitt okkur fyrir því að styrkja iðn-, verk- og starfsnám og kynna betur þá fjölbreyttu námskosti sem bjóðast á framhaldsskólastiginu. Þetta eru ekki endanlegar tölur en þær gefa okkur jákvæðar vísbendingar um að við séum á réttri leið.“
Í fyrra innrituðust 65% nemenda á bóknámsbrautir, 12% nemenda á verk- eða starfsnámsbrautir, 5% nemenda á listnámsbrautir, og 18% á almenna námsbraut eða framhaldsskólabraut sem einkum eru ætlaðar þeim sem ekki uppfylla inntökuskilyrði fyrir aðrar námsbrautir.