Verksmiðjan formlega gangsett
Opnunarathöfn Verksmiðjunnar fór fram í Stúdíói A hjá RÚV í Útvarpshúsinu, Efstaleiti 1, þar sem Verksmiðjan var formlega gagnsett, meðal annars með opnun vefsíðunnar ungruv.is/verksmiðjan þar sem hægt verður að fylgjast með verkefninu.
Verksmiðjan er nýsköpunarkeppni fyrir ungt fólk í 8.-10. bekk - þar sem allar hugmyndir geta orðið að veruleika. Verksmiðjan er samstarfsverkefni RÚV, Samtaka iðnaðarins, Nýsköpunarmiðstöðvar Íslands, Fab Lab á Íslandi, Nýsköpunarkeppni grunnskólanna, mennta- og menningarmálaráðuneytisins og Listasafns Reykjavíkur.
Verksmiðjan hvetur ungt fólk til að taka eftir hugmyndum sínum og umhverfi og finna lausnir á ýmsum vandamálum, stórum sem smáum. Þátttakendum er fylgt eftir og þeir myndaðir af framleiðsluteymi RÚV. Fimm sjónvarpsþættir um Verksmiðjuna, iðngreinar og nýsköpun verða sýndir á RÚV og verðlaunaafhending verður síðan haldin í Listasafni Reykjavíkur seinni partinn í maí.
Á opnunarathöfninni voru ávörp frá mennta- og menningarmálaráðherra, Lilju Alfreðsdóttur, frá framkvæmdastjóra Samtaka iðnaðarins, Sigurði Hannessyni, og frá útvarpsstjóra, Magnúsi Geir Þórðarsyni. Þá voru sýnd hljóðfæri sem voru unnin í Fab Lab á Hornafirði. Nemendur úr Breiðholtsskóla og Hólabrekkuskóla voru viðstödd opnunarathöfnina.
Lilja Alfreðsdóttir, mennta- og menningarmálaráðherra.
Sigurður Hannesson, framkvæmdastjóri SI.
Magnús Geir Þórðarson, útvarpsstjóri.
Berglind Alda er annar af tveimur kynnum Verksmiðjunnar, hinn er tónlistarmaðurinn Daði Freyr.
Jóhanna Vigdís Arnardóttir, verkefnastjóri í menntamálum hjá SI.
