Við bætum lífskjörin með bættri samkeppnishæfni
Góð lífskjör í dag tryggja ekki sjálfkrafa góð lífskjör á morgun. Til að tryggja góð lífskjör til framtíðar þarf að hlúa að því sem skapar sterka samkeppnishæfni. Þar skipta mannauður, nýsköpun, innviðir, orku- og umhverfismál og hagkvæmt, skilvirkt og stöðugt starfsumhverfi mestu máli, líkt og fjallað er um í nýlegri greiningu Samtaka iðnaðarins. Þetta segir Ingólfur Bender, í grein í Morgunblaðinu með yfirskriftinni Við bætum lífskjörin með bættri samkeppnishæfni. Hann segir að Ísland sé gott land að búa í. Lífskjör hér séu meðal þeirra bestu í heimi, atvinnuþátttaka sé mikil, mannauðurinn sterkur og íslenskt atvinnulíf hafi ítrekað sýnt að það geti brugðist hratt við breytingum og skapað ný verðmæti. Það sé mikilvægt að halda þessu til haga nú þegar útlitið í efnahagslífinu er dökkt og aðstæður eru krefjandi.
Rétti tíminn til að stilla saman strengina og finna samhljóm um nauðsynlegar aðgerðir
Ingólfur segir að svartsýni hafi aukist verulega meðal almennings og stjórnenda fyrirtækja síðustu mánuði. Í nýrri könnun sem Gallup gerði meðal stjórnenda stærstu fyrirtækja landsins komi fram að aðeins 5% telja aðstæður í efnahagslífinu góðar en 64% telji þær slæmar. Þar komi einnig fram að aðeins 5% telji að aðstæður muni batna á næstu sex mánuðum en 58% telji að þær muni versna. Þessu til viðbótar sýni væntingavísitala Gallup að almenningur hafi litla tiltrú á aðstæðum í efnahagsmálum um þessar mundir og séu svartsýnir á framhaldið. Hann segir að nú sé rétti tíminn til að stilla saman strengina og finna samhljóminn um nauðsynlegar aðgerðir. Byggja þurfi á þjóðarsátt þar sem stjórnvöld, atvinnulíf og aðilar vinnumarkaðarins leggi sitt af mörkum til að ná niður verðbólgu og vöxtum, efla samkeppnishæfni Íslands og styrkja verðmætasköpun. Með þjóðarsátt sé hægt að draga úr óvissu, auka traust og tiltrú til lengri tíma og tryggja að íslenskt hagkerfi standi sterkara til framtíðar. Ingólfur segir að samkeppnishæfni sé ekki sérhagsmunamál fyrirtækja heldur lífskjaramál almennings. Þegar samkeppnishæfnin sé sterk geti fyrirtæki fjárfest meira, tekið upp nýja tækni, ráðið fleira fólk og greitt hærri laun. Þá aukist útflutningur, skattstofnar styrkjast og lífskjör landsmanna batna.
Hér er hægt að lesa grein Ingólfs í heild sinni.
Morgunblaðið, 2. júlí 2026.
