Vilja að frumvarp um fjarskipti verði dregið til baka
Samtök atvinnulífsins, Samtök iðnaðarins og Viðskiptaráð Íslands gera alvarlegar athugasemdir við frumvarp um breytingu á lögum um fjarskipti, lögum um Fjarskiptastofu og lögum um fjárfestingu erlendra aðila í atvinnurekstri, 169. mál, í umsögn sinni.
Í umsögninni er gagnrýnt samráðsleysi við gerð frumvarpsins og þann hraða sem lagt er upp með við að koma umræddum breytingum í gegn. Leggja samtökin til að fallið verði frá frumvarpinu og að efnisatriði frumvarpsins verði tekin inn í annars vegar heildarskoðun á lagaumgjörð erlendrar fjárfestingar og rýni á fjárfestingu erlendra aðila í samfélagslega mikilvægum innviðum, sem stendur til að leggja fram, og hins vegar heildarendurskoðun á fjarskiptalögum. Samtökin segja að nauðsynlegt sé að hvers kyns lagabreytingar á sviði erlendrar fjárfestingar séu vel ígrundaðar og byggi á samráði við íslenskt atvinnulíf enda skiptir erlend fjárfesting íslenskt efnahagslíf miklu máli til framtíðar.
Í niðurlagi umsagnarinnar segir að í ljósi þeirra atriða sem að framan séu rakin hvetji samtökin til þess að frumvarpið verði dregið til baka en efnistök þess tekin inn í heildarendurskoðun á annars vegar fjarskiptalögum og hins vegar rýni fjárfestinga erlendra aðila í þýðingarmiklum samfélagsinnviðum og tengdri starfsemi vegna þjóðaröryggis á komandi ári.
Hér er hægt að nálgast umsögnina í heild sinni.