Yngstur til að ná sveinsprófi í rafvirkjun
Hlynur Gíslason náði þeim árangri í febrúar síðastliðnum að vera yngsti próftaki sem náð hefur sveinsprófi í rafvirkjun, aðeins átján ára. Af því tilefni fékk hann viðurkenningu frá Samtökum rafverktaka og Félagi íslenskra rafvirkja í samstarfi við Johan Rönning. Á myndinni eru, talið frá vinstri, Kristján Daníel Sigurbergsson, framkvæmdastjóri SART, Pétur H. Halldórsson, formaður FLR og varaformaður SART, Hlynur Gíslason, sveinn í rafvirkjun, Margrét Arnarsdóttir, formaður FÍR og varaformaður RSÍ, Jón Ólafur Halldórsson formaður sveinsprófsnefndar, og Kristján Þ. Snæbjörnsson, formaður RSÍ.
Í Morgunblaðinu er rætt við Hlyn þar sem hann segir meðal annars þegar hann er spurður hvernig honum þyki að taka á móti slíkri viðurkenningu: „Allt í lagi svona, maður lætur sig hafa það að taka á móti henni.“ Í Morgunblaðinu kemur fram að Hlynur hafi í desember síðastliðnum brautskráðst af rafvirkjabraut og sem stúdent frá Fjölbrautaskólanum í Breiðholti. Þá hlaut hann viðurkenningu fyrir bestan árangur á rafvirkjabraut auk þess sem hann fékk viðurkenningu fyrir árangur sinn í dönsku og spænsku. Hlynur lauk síðan sveinsprófinu í febrúar síðastliðnum, þá á nemasamningi hjá Veitum. Þegar hann er spurður í Morgunblaðinu hvers vegna hann hafi valið rafvirkjanámið segir hann: „Þetta er hagnýtt nám og praktískt sem maður getur notað alls staðar. Það er hagnýt menntun og mjög nýtanleg.“
Kristján Daníel Sigurbergsson, framkvæmdastjóri SART, afhendir Hlyni viðurkenningu frá Samtökum rafverktaka og Félagi íslenskra rafvirkja í samstarfi við Johan Rönning.
Morgunblaðið, 9. október 2021.