Hægt að finna alvöru meistara á nýrri vefsíðu
Samtök iðnaðarins í samstarfi við Meistaradeild SI hafa opnað nýja vefsíðu, meistarinn.is, þar sem neytendur geta leitað að alvöru meisturum. Á vefsíðunni geta neytendur leitað eftir iðnmeistara í 13 aðildarfélögum Samtaka iðnaðarins, hvort heldur er eftir landssvæði eða meistarafélagi. Á vefsíðunni geta neytendur einnig nálgast handhægar upplýsingar um Ábyrgðarsjóð Meistaradeildar SI, sýnishorn af verksamningi og aðrar upplýsingar sem hafa þarf í huga þegar iðnmeistari er ráðinn til verks.
Til að vekja athygli á vefsíðunni verða birtar auglýsingar á samfélagsmiðlum, vefsíðum og fjölmiðlum næstu vikurnar. Við val á verktaka er mikilvægt að neytendur horfi til þess hvort um sé að ræða fagmenntaðan einstakling sem er löggiltur iðnmeistari á viðkomandi sviði. Iðnmeistari hefur hlotið staðfestingu á að hann hafi fullnægjandi færni til að sinna verkum á sínu sérsviði og eru flestir iðnmeistarar aðilar að meistarafélögum sem hægt er að leita til ef viðkomandi skilar ekki verki í samræmi við samning.
Á vefsíðunni meistarinn.is eru eingöngu fyrirtæki sem rekin eru af iðnmeisturum sem eru félagsmenn meistarafélaga innan Samtaka iðnaðarins.
