Iðnaðurinn lætur sig umhverfis- og loftslagsmál varða
Iðnaður lætur sig umhverfis- og loftslagsmál sannarlega varða. Íslensk fyrirtæki hafa náð miklum árangri á því sviði og hafa metnað til að gera enn betur til að mæta skuldbindingum Parísarsamkomulagsins. Iðnaðurinn mun ekki láta sitt eftir liggja á nýju ári í umhverfis- og loftslagsmálum. Þetta segir Sigurður Hannesson, framkvæmdastjóri SI, meðal annars í grein sinni sem birt er í Kjarnanum undir yfirskriftinni 2019 er ár aðgerða. Sigurður segir jafnframt um loftslagsmálin að stjórnvöld hafa einnig sett þau á dagskrá og munu vonandi láta verkin tala árið 2019. Hann segir að orkustefna stjórnvalda sé í mótun og megi búast við niðurstöðum þeirrar vinnu í lok árs 2019. Þar verði að taka tillit til þeirrar staðreyndar að það sé mikil eftirspurn eftir orku, jafnt frá hefðbundnum iðnaði og nýjum iðnaði. Hin hreina raforka landsins skapi Íslandi sérstöðu meðal annarra ríkja og höfum við því góða sögu að segja í loftslagsmálum. Sigurður segir að hagstætt orkuverð hafi skapað Íslandi forskot í samkeppni við önnur ríki en dregið hafi úr því forskoti og að skýr atvinnustefna gæti auðveldað þessa stefnumótun.
Í niðurlagi greinar sinnar segir Sigurður að árið 2019 sé sannarlega ár tækifæranna, árið sem stefnumótandi ákvarðanir séu teknar til langs tíma og ár aðgerða sem varði veginn til aukinnar hagsældar. Umræður og greiningarvinna ársins 2018 hafi undirbúið jarðveginn og auðveldi ákvarðanatöku og aðgerðir ársins 2019. Skýr sýn stjórnvalda sendi skilaboð til almennings og atvinnulífs og hafi áhrif á ákvarðanatöku og athafnir. „Látum þau áhrif verða jákvæð og leysa orku úr læðingi samfélaginu til heilla.“
Hér er hægt að lesa grein Sigurðar í heild sinni.