Mikill áhugi í Bretlandi á íslenskum leikjaiðnaði
Samtök leikjaframleiðenda, IGI, ásamt CCP Games, Íslandsstofu og íslenska sendiráðinu í Bretlandi stóðu fyrir viðburði í London fyrir skömmu fyrir íslensk leikjafyrirtæki sem hafa áhuga á að kynnast breskum markaði. Á viðburðinn mættu bæði íslenskir og erlendir fjárfestar og aðilar úr breska stuðningsumhverfinu. Fulltrúi Samtaka iðnaðarins á fundinum var Nanna Elísa Jakobsdóttir, viðskiptastjóri á iðnaðar- og hugverkasviði auk stjórnar IGI. Á viðburðinum sem var vel sóttur kom fram að mikill áhugi er í Bretlandi á íslenskum leikjaiðnaði.
Sturla Sigurjónsson, sendiherra Íslands í Bretlandi, opnaði viðburðinn og lagði áherslu á það í erindi sínu hversu mikið íslenskur leikjaiðnaður hefði vaxið á undanförnum áratug. Hilmar Veigar Pétursson, framkvæmdastjóri og stofnandi CCP, sagði frá sinni reynslu í leikjaiðnaði en enginn í sögu leikjaiðnaðar hefur átt jafnmikilli velgengni að fagna og Hilmar með CCP. Stofnun CCP og vöxtur hefur haft mikil áhrif á vöxt íslensks leikjaiðnaðar á liðnum árum. Þorgeir Frímann Óðinsson, formaður IGI og framkvæmdastjóri Directive Games North, flutti því næst tölu um stöðuna í leikjaiðnaði, stuðningsumhverfi nýsköpunar á Íslandi og áhrif öflugrar hagsmunagæslu. María Guðmundsdóttir, framkvæmdastjóri Parity Games, steig síðust á svið og fjallaði um sérstöðu Íslendinga þegar kemur að skapandi iðnaði eins og leikjaiðnaði.
Hilmar Veigar Pétursson, framkvæmdastjóri og stofnandi CCP.
Þorgeir Frímann Óðinsson, formaður IGI og framkvæmdastjóri Directive Games North.
María Guðmundsdóttir, framkvæmdastjóri Parity Games.
Sturla Sigurjónsson, sendiherra Íslands í Bretlandi.
